Vitia do të mbështes bizneset duke pezulluar taksën komunale

Viti – Drejtori për Financa, Ekonomi dhe Zhvillim Ibrahim Rama, ka njoftuar anëtarët e KPF-së se edhe gjatë vitit 2016 do të mbështeten bizneset duke e pezulluar taksën komunale edhe këtë vit si vitet e kaluara.

Është mbajtur mbledhja e XII-të dhe e fundit për këtë vit e rregullt e Komitetit për Politikë e Financa, në të cilën janë diskutuar pikat e rendit të ditës si; Propozim rregullorja për taksa, ngarkesa dhe gjoba, propozim vendimi për caktimin e lokacionit për ndërtimin e bustit të dëshmorit të kombit Hoxhë Jonuz Zejnullahu në Zonën Kadastrale në Gjylekar, plani strategjik dhe plani vjetor për Njësinë e Auditimit të brendshëm në Komunën e Vitisë për periudhën kohore 2016, si dhe planifikimi i prokurimit për vitin fiskal 2016.

Lidhur me pikën rreth propozim rregullores për taksa, ngarkesa dhe gjoba, në prezantimin e saj drejtori për Financa, Ekonomi dhe Zhvillim Ibrahim Rama, ka njoftuar anëtarët e KPF-së se ajo është e përgatitur dhe shqyrtuar edhe me drejtoritë komunale. Po ashtu ka bërë të ditur se edhe gjatë vitit 2016 do të mbështeten bizneset duke e pezulluar taksën komunale edhe këtë vit si vitet e kaluara.

Anëtarët e KPF-së kanë paraqitur vërejtjet e tyre dhe plotësimet në këtë rregullore, për të cilat drejtori Rama tha se do të konsultoj drejtorët komunal dhe do t`i inkorporojë ato për seancën e Kuvendit.

Ndërkaq edhe nga Zyra ligjore është thënë se rregullorja për taksa, ngarkesa dhe gjoba, është përgatitur në harmoni me ligjet pozitive të Republikës së Kosovës. Me vërejtjet dhe sugjerimet e anëtarëve të KPF-së kjo propozim rregullore u miratua për të u proceduar në mbledhjen e Kuvendit.

Gjithashtu edhe propozim vendimi për caktimin e lokacionit për ndërtimin e bustit të dëshmorit të kombit Hoxhë Jonuz Zejnullahu në Zonën Kadastrale në Gjylekar, u miratua për seancën e fundit të Kuvendit për këtë vit, ndërkaq dy pikat e tjera rreth planit strategjik të Njësisë së Auditimit, si edhe planifikimi i prokurimit për vitin 2016, ishin informatë për anëtarët e KPF-së./rajonipress/