Viti i Valon Berishës

Valon Berisha është futbollisti kryesor i Përfaqësueses së Kosovës qyshkur i ishte bashkuar Verdhekaltërve duke hequr dorë nga Përfaqësuesja e Norvegjisë.

Madje, mesfushori kreativ ishte zgjedhur në dy vjetët e fundit futbollisti i vitit në Kosovë, shkruan sot gazeta Zëri.

Krahas Përfaqësueses, Berishës po ia do edhe me ekipin e tij Red Bull Salzburg.

Futbollisti i lindur në Suedi dhe i rritur në Norvegji e ka marrë në dorë skuadrën austriake, të cilën po e udhëheq drejt sukseseve.

Shkëlqen në Europa League

Berisha konsiderohet njëra prej befasive më të mëdha të Europa Leagues këtë edicion.

Prishtinasi e ka vendosur fitoren e Salzburgut ndaj Borussia Dortmundit duke realizuar dy gola në ndeshjen e parë çerekfinale, duke shënuar në minutat 49 e 56, për t’ia siguruar ekipit të tij fitoren 2:1 ndaj gjigantit gjerman.

Këtë edicion Berisha ka realizuar 4 gola në 8 ndeshje me Salzburgun në Europa League.

I dobishëm edhe në Austri

Berisha po tregon formë të jashtëzakonshme edhe në kampionatin austriak.

Këtë sezon ai ka realizuar 3 gola në 23 ndeshje, derisa shquhet më shumë për asistime, duke i dhuruar 7 sosh për shokët.

Madje, pas golit të shënuar pak ditë më parë në derbin austriak Berisha filloi të qante pasi atë ia kushtoi gjyshes, që i kishte vdekur ato ditë.

Deri vitin e kaluar ai kishte realizuar 29 gola në 168 ndeshje me ekipin austriak.

Një statistikë jo e keqe për një lojtar që vetëm viteve të fundit i është afruar portës.

Ai ka aftësi të shkëlqyeshme dhe shquhet edhe në aspektin defanziv dhe në atë ofanziv.

Një lojtar jo më i ri, por që e ka zgjuar interesimin e skuadrave të njohura evropiane.

Momenti i hapit të radhës

Berisha e kishte nisur karrierën në Norvegji, në ekipin e të rinjve të Egersundit, ku kishte debutuar edhe për të mëdhenjtë, ndërsa më pas ka luajtur dy sezone me Vikingun.

Në vitin 2012 i kishte arritur ftesa nga Austria, ku e pëlqente Salzburgu dhe nga ajo kohë luan atje.

Ky mund të jetë sezoni i fundit i Berishës në futbollin austriak pasi flitet se ai gjatë verës mund të transferohet në ndonjë skuadër të Premierligës.

Për të interesim ka shfaqur Newcastle. /Zëri/