Viti i trofeve për Shaqirin

Një lëndim i muskulit në ndeshjen e parafundit kualifikuese për kampionatin botëror kundër Shqipërisë, bëri që Xherdan Shaqiri të mbetet për dy muaj jashtë fushës.

Mesfushori 22-vjeçar u rikthye në takimin e fundit të Bundesligës, duke shënuar golin e dytë sezonal për Bayernin, në fitoren 3:1 ndaj Hamburgut.

“Kjo absolutisht është një përvojë e re për mua. Gjëja më e rëndësishme në këto moment është të ndihmojë skuadrën. Tani jam i gatshëm fizikisht”, ka thënë Shaqiri për mediat zvicerane.

Ai momentalisht ndodhet në Maroko, ku me Bayernin po kërkojnë titullin e botës për klube, që do të ishte i katërti këtë vit për Shaqirin. “Ne duam të fitojmë edhe këtë titull dhe të shkojmë me ndjenjë pozitive në pushime”, shtoi ai.

Shaqiri luajti kundër Guanzhout në fitoren 3:0. Ai shijoi 20 minuta, kurse pati edhe goditje të mirë, e cila qëlloi rrjetën e jashtme të portës.