Viti 2016, viti i Adem Demaçit

Ka përfunduar takimi i kryetarit të Kuvendit të Kosovës, Kadri Veseli me Shoqatën e të Burgosurve Politik. Pas takimit përfaqësuesi i kësaj shoqate, Hydajet Hyseni tha se viti 2016 do të quhet vit i Adem Demaçit.

“Është formuar një Këshill organizativ i cili me solidarizimin e Kuvendit të Kosovës dhe në bashkëpunim me segmente të tjera do të përpiqemi ta shënojmë përvjetorin si dhe ta quajmë vitin 2016, vit të Adem Demaçit”, ka thënë Hyseni.

Ndërkohë kryetari i Kuvendit, Kadri Veseli tha se është nder për të që të bëjë diçka për simbolin e kombit, Adem Demaçi.

“Do të bëjmë gjithçka që është në përgjegjësi institucionale. Kosova ia ka borxh vetëm një njeriu dhe ai është Adem Demaçi. Sheshet në tërë republikën e Kosovës do të marrin emrin e tij”, ka thënë Veseli.

Ndryshe, këto organizime bëhen për nder të veprimtarit Adem Demaçit, i cili ka ditëlindjen më 26 shkurt. Më 26 shkurt 2016 do të ketë akademi për ditëlindjen e Adem Demaçit dhe seancë parlamentare. Telegrafi/