Viti 2015 më i suksesshmi në fushën e sigurisë në Viti

Viti – Është mbajtur sot mbledhja e rregullt Këshillit Komunal për Siguri në Bashkësi, ku u shqyrtua gjendja e sigurisë dhe u paraqitën shqetësimet e qytetarëve për problem të ndryshme.

Hasan Aliu zv. kryetar i komunës, ka theksuar se për gjatë periudhës së mbledhjes së kaluar të KKSB-së e deri më tani, nuk është raportuar për ndonjë ekses që duhet veçuar. Ai ka përmendur mbarëvajtjen e manifestimit Flakadani i Karadakut, ku aktivitetet janë zhvilluar me sukses dhe pa ndonjë problem, për çka ka falënderuar si këshillin Organizativ, po ashtu edhe mekanizmat si ata të sigurisë e po ashtu edhe të tjerë, për angazhimin e tyre.

Për gjendjen e sigurisë në komunën e Vitisë gjatë 3 muajve të parë të këtij viti, togeri Burim Musliu ka njoftuar se fillim viti ka nisur suksesshëm me ulje të mëtutjeshme të rasteve. “Viti i kaluar është vlerësuar si më i suksesshmi në aspektin e sigurisë, por duhet të themi se edhe ky tre mujor ka filluar mjaftë mirë. Kemi rënie të rasteve të përgjithshme për 7 % krahasuar me periudhën e njëjtë të vitit të kaluar. Vjedhjet e rënda kanë qenë 60 në vitin 2015, kurse 50 këtë vit, që do të thotë për 20 % më pak. Edhe rastet e aksidenteve janë dukshëm në rënie ku krahasuar me tre mujorin e parë të vitit të kaluar ku janë shënuar 31 aksidente, sivjet kemi 16, pra për gjysmë më pak”, ka thënë togeri Musliu.

Sa i përket rasteve të dhunës në familje, sivjet është një më shumë, pra në vitin 2015 kanë qenë 6, kurse në tre mujorin e këtij viti janë 7 raste.

Në këtë mbledhje, Imri Emërllahu ka paraqitur shqetësimet e qytetarëve që EVSB ka identifikuar në terren.

Ai kërkoi që këto adresime, të gjejnë zgjidhje dhe të eliminohen ato. Edhe Bujar Ostërgllava , Xhemajl Hasani e Ibrahim Sefedini anëtarë të KKSB-së, paraqiten disa nga problemet që janë identifikuar në terren, por edhe në qytetin e Vitisë e që lidhet direkt me sigurinë e qytetarëve.

Si rekomandim në këtë mbledhje dolën shqyrtimi i mundësive për hapjen e kanaleve dhe përroskave. Parandalimi i hedhjes së mbeturinave në lumenj apo përroska. Intensifikimi i inspekcionit për ndalimin e pirjes së duhanit në vende publike dhe patrullimi i policisë për parandalimin e parkingut të veturave para objektit të komunës që shpesh po shkakton rrëmujë./rajonipress/