Vihet gurëthemeli i Shkollës Fillore “Hasan Prishtina” në fshatin Busavatë

Kamenicë – Është hedhur gurëthemeli i Shkollës Fillore “Hasan Prishtina” në fshatin Busavatë.

Në këtë ceremoni morën pjesë përfaqësues nga: Ministria e Arsimit Shkencës dhe Teknologjisë, Kryetari i Komunës së Kamenicës Begzad Sinani me struktura tjera komunale, nxënës, mësimdhënës e banorë të fshatit Busavatë, si dhe mysafirë të tjerë.

Drejtori i kësaj shkolle Abedin Maliqi, në fjalën e rastit pos tjerash tha: “I falënderoj te gjithë ata që kanë kontribuar në realizimin e këtij projekti të rëndësishëm për banorët e këtij fshati siç janë: Destan Maliqi i cili ka dhuruar 35 ari pronë tokësore, Vildane Maliqi për realizimin e projektit të oborrit të shkollës, Kryetarin e Komunës Begzad Sinani, drejtorin e Drejtorisë së Arsimit, drejtorin e Administratës së Përgjithshme dhe Ministrin e Arsimit Shkencës dhe Teknologjisë Arsim Bajramin. Me ndërtimin e kësaj shkolle do të përmirësohen kushtet për nxënësit, arsimtarët dhe stafin tjetër ”.

Ndërsa Kryetari Sinani në fjalën e tij u shpreh: “Jemi mbledhur sot për vënien e gurëthemelit të objektit ri të Shkollës Fillore në Busavatë, ne nuk do të ndalemi me kaq, por do të vazhdojmë që edhe shkollat të tjera të komunës tonë nxënësve dhe mësimdhënësve të iu mundësojmë kushte të mira për punë. Që nga dita e parë kemi pasur këtë dinamikë si qeverie lokale, këtë trend të punës, të realizimit të projekteve të cilat po i realizojmë një nga një dhe deri në 20 shtator do t`i realizojmë të gjitha projektet e planifikuara për këtë vit ”.

Po ashtu kryetari premtoj aneks kontratën për rrethojën e shkollës, rrugën, si dhe ujësjellësin e shkollës pasi që burimin e ujit e ka siguruar bashkëfshatari Enver Maliqi.

Vlera e këtij objekti i cili financohet nga Ministra e Arsimit Shkencës dhe Teknologjisë, është 241.645,69 euro./rajonipress/