Vetëvendosje kundërshton shkuarjen e Mustafës në Bruksel

Lëvizja Vetëvendosje ka kundërshtuar shkuarjen e kryeministrit Isa Mustafa në Bruksel, për të vazhduar dialogun me Serbinë, duke thënë se Mustafa dhe Thaçi kanë sjellë vendime që e cenojnë rëndë sovranitetin e shtetit të Kosovës.

Glauk Konjufca nga Vetëvendosje tha në një konferencë për media se në marrëveshjet e fundit ka pasur shumë lëshime dhe është shkelur Kushtetuta e Kosovës.

Këtë sipas tij, e konfirmon edhe vendimi i Gjykatës Kushtetuese, raporton Telegrafi.

Sipas Konjufcës, mosmbajtja e premtimit nga kryeministri, i cili pati thënë se nuk do të shkojë në Bruksel pa i marrë vizat qytetarë e Kosovës, i bie që ka mashtruar qytetarët dhe kjo tregon se është një kryeministër joserioz.

Ai më tej u shpreh se Mustafa dhe Thaçi kanë sjell vendime që e cenojnë rëndë sovranitetin e shtetit të Kosovës.

Konjufca tha se në vend që këta të japin përgjegjësi për çfarë kanë bërë, ata vazhdojnë prapë me të njëjtat koordinata.

Sipas tij, këshilltarët e Mustafës që sillen si shumë të zot sjellin marrëveshje që janë në kundërshtim me Kushtetutën, ndërsa shkojnë më shumë për vizita turistike.

Ai konfirmoi se më 17 shkurt do të jetë protesta e radhës dhe shprehu bindjen se qytetarët do t’i shprehin pakënaqësitë e tyre. /Telegrafi/