Vetëm 20 minuta ushtrime për të ulur pezmatimin

Një studim i ri tregon se vetëm 20 minuta ushtrime në ditë mund të ulin rrezikun nga pezmatimi në trupin e njeriut.

Përfitimet afatgjata të aktivitetit fizik janë të shumta, duke përfshirë reduktimin e rrezikut të sëmundjeve kardiovaskulare, përmirësimin e metabolizmit dhe kontrollit të peshës sikurse edhe forcimi i zemrës, muskujve dhe eshtrave.

Sipas Departamentit Shtetëror Amerikan për Shërbime Shëndetësore dhe Njerëzore, një dozë e rregullt e aktivitetit fizik ulë tensionin e gjakut dhe redukton rrezikun e diabetit të tipit 2, gjithashtu edhe të disa formave të kancerit.

Studimi i ri i publikuar në revistën “Truri, Sjellja dhe Imuniteti”, hulumton përfitimet e ushtrimeve 20 minutëshe dhe efektit për sistemin imunitar trupor, transmeton Indeksonline.

Hulumtuesit nga Universiteti i Kalifornisë, Shkolla e Mjekësisë së San Diegos supozojnë se ushtrimet prej vetëm 20 minutash në ditë mund të ulin inflamacionin në trupin e njeriut, nëpërmjet aktivizimit të sistemit nervor simpatik.

Sistemi nervor simpatik ndihmon në rritjen e rrahjeve të zemrës, tensionit të gjakut, shkallën e frymëmarrjes. Ushtrimet fizike aktivizojnë këtë sistem për të ndihmuar trupin të qëndrojë në formë.

Gjatë kësaj kohe, trupi liron hormone sikurse epinefrina dhe norepinefrina në sistemin e qarkullimit të gjakut gjë e cila aktivizon receptorët adrenergjik të qelizave të imunitetit./Indeksonline/