Veseli: Vendimi për liberalizimin e vizave duhet të merret në dhjetor, në të kundër është racizëm i skajshëm

Kryetari i Kuvendit të Kosovës, Kadri Veseli ka thënë sot se nuk do të heqin dorë nga e drejta e lëvizjes së lirë, ndërsa sipas tij nëse vendimi për liberalizimin e vizave nuk do të merret në dhjetor nga institucionet përkatëse të BE-së atëherë ky është një racizëm i skajshëm.

Veseli pas mbledhjes së Kryesisë së Kuvendit tha se është e drejtë e qytetarëve të Kosovës të lëvizin lirshëm dhe pas plotësimit të kritereve bashkësia evropiane duhet të reflektojë.

“E drejta na takon që në dhjetor të merret vendimmarrja e Bashkimit Evropian për liberalizimin e vizave, ndryshe, ky është qëndrimi im politik është racizëm, është racizëm i skajshëm”, tha Veseli, raporton Telegrafi.

Ai tha se presin që Austria, si kryesuese e radhës e Presidencës së BE-së të procedojë çështjen e liberalizimit të vizave në Këshillin e Ministrave, megjithëse Veseli tha se janë në dijeni që ka vende skeptike.

“Deri tani na është thënë se është se liberalizimi i vizave është çështje teknike, tani kanë filluar zëra se nga qenka edhe politike. Do të jetë goditje e vet vlerave të Bashkimit Evropian”, tha Veseli, duke shtuar se nisur nga kjo logjikë i bie që Kosova që 10 vjet po mbahet politikisht e izoluar.

Ai tha se prej vendeve të Ballkanit Perëndimor, Kosova qëndron më mirë se shumica e shteteve.

“… Atëherë cila është arsyeja…jemi krenar për atë që jemi…”, tha Veseli, duke shtuar se do ta vazhdojnë lobimin. /Telegrafi/