Veseli preferon koalicion me LDK-në, jo me AAK-në

Nënkryetari i Partisë Demokratike të Kosovës, Kadri Veseli deklaroi të enjten se Fatmir Limaj dhe Jakup Krasniqi e kanë vendin në PDK, ndërkaq duke folur për koalicionet tha se preferon një koalicion me LDK-në, e jo me Aleancën për Ardhmërinë e Kosovës. Ai këto komente i bëri në një intervistë në emisionin “Zona e Debatit” në Klan Kosova.

Veseli tha se beson që PDK do t’i kalojë sfidat dhe pohoi se angazhohet për logjikën e integrimeve dhe jo të përjashtimeve.

Nënkryetari i PDK-së tha se Krasniqi dhe Limaj janë dy personalitete serioze dhe kanë një të kaluar të përbashkët.

Se a e përkrah një takim Thaçi-Kransiqi-Limaj, Veseli tha se mbështet logjikën e integrimeve në emër të principeve, për të mirë të qytetarëve dhe është pro komunikimit.

Ai shprehu besimin se Krasniqi dhe Limaj do të jenë pjesë e PDK-së, e kanë përkrahjen e tij dhe janë të mirëpritur në PDK.

Veseli ka folur edhe për zgjedhjet lokale në vend. Ai tha se nuk i pëlqen që PDK të cilësohet si humbëse në këto zgjedhje.

Ndërkaq, duke folur për koalicionet e mundshme, Veseli tha se preferon një koalicion me LDK-në.

Ai në emisionin “Zona e Debatit”, tha se një koalicion PDK-AAK nuk është në të mirë të Kosovës.

“Nuk jam entuziast se do t’i sjell të ardhmes së Kosovës kualitet të fuqishëm të zhvillimit, i cili i duhet në këtë fillimshekull ta ketë ky shtet i ri”, ka thënë Veseli.

Sipas tij, një opsion më i mirë do të ishte një koalicion me LDK. /Telegrafi