Veseli: Opozita duhet ta shfrytëzoj foltoren e jo ta bllokoj atë
Kryetari i Kuvendit të Kosovës, Kadri Veseli, sot pas mbledhjes së Kryesisë së Kuvendit, në një konferencë për media ka ftuar opozitën që t’i shfrytëzoj seancat parlamentare për diskutim e jo t’i bllokoj ato. Veseli duke komentuar paralajmërimin e opozitës për bllokim të punës së Kuvendit ka thënë se Kuvendi duhet të jetë vendi ku duhet të jenë bashkë pozitë e opozitë edhe kur nuk pajtohen me njëra – tjetrën e edhe kur ndajnë mendime të përbashkëta, raporton lajmi.net.
“Në Kuvend duhet të respektohet rregullorja”, ka thënë Veseli.
“Kërkoj nga opozita që t’i drejtohet foltores dhe aty të e thotë atë çfarë kanë për të thënë. Nëse ata e bllokojnë foltoren është në dëmin e tyre, sepse qytetarët i kanë zgjedhur që të flasin në Kuvend, dhe jo ta bllokojnë atë”.
Ndërsa, lidhur me mundësinë e një takimi për përbashkët të liderëve për të gjetur zgjidhje për të dalur nga kriza, të cilën vetë Veseli e kishte propozuar, ai ka thënë se është i gatshëm të ndihmojë në këtë, edhe pse sipas tij kjo më shumë do të duhej t’i takonte Presidentes si institucion që përfaqëson unitetin politik në vend.