Veseli: Lëvizja paqësore dhe lufta e UÇK-së e kanë sjellë lirinë

Kryetari i Kuvendit, Kadri Veseli u ka thënë bijve të ish-presidentit Ibrahim Rugova se duhet të jenë krenarë me babanë e tyre.

Veseli sot vizitoi familjen e ish-presidentit në shtëpinë e tyre në Velani me rastin e 24 majit, që njihet edhe si Dita e Presidentit.

Kjo ditë ka mbetur për shkak se më 24 maj të vitit 1992 Ibrahim Rugova ishte zgjedhur president i Kosovës.

Para se të shkojë për vizitë familjes Rugova, Veseli ka bërë homazhe edhe tek varri i ish-presidentit të ndjerë.

Kryetari i Kuvendit tha se zgjedhja e Ibrahim Rugovës, president, para 24 vjetësh në të njëjtën kohë i ka dhënë një dimension të ndarjes përfundimtare të rrugëtimit politik të Kosovës nga Serbia.

“Lëvizja e rezistencës paqësore dhe lufta e UÇK-së janë dy anë të një medalje e cila e ka sjellë lirinë. Ato duhet vetëm të na bashkojnë gjithë qytetarët e Kosovës për çka duhet të jemi krenar që sot e kemi lirinë dhe shtetin tonë”, tha Veseli.