Veseli: Kur ndalet PDK, ndalet Kosova

Kryetari i Partisë Demokratike të Kosovës, Kadri Veseli, ka takuar strukturat e Gruas Demokratike, për të filluar kështu zgjedhjet edhe në këtë forum partiak.

Duke shpalosur platformën e PDK-së për ‘Dekadën e Re’, Veseli tha se zhvillimi ekonomik i vendit, integrimi euro atlantik si dhe besimi në shtetin e Kosovës, nuk mund të ndodhin pa rolin aktiv të grave, njofton PDK, përcjell Klan Kosova.

“Partia Demokratike e Kosovës beson dhe punon për gjithëpërfshirjen e grave në shoqëri dhe institucione. I beson forcës së tyre transformuese. Potencialit të tyre zhvillimor. Lidershipit të tyre në politikë, në biznes, në shoqërinë civile, e në krejt sferat e jetës sociale”.

“Nuk do të ndalemi. Nuk jemi të kënaqur me atë që kemi bërë. Kërkohet më shumë nga ne. Duhet të kërkojmë më shumë nga vetja. Partia Demokratike e Kosovës, ka qenë dhe mbetet, subjekti kryesor që garanton ecjen përpara të vendit”, ka thënë Veseli ndër të tjera.

“Kur ndalet Partia Demokratike e Kosovës, ndalet Kosova”.

“Partia Demokratike e Kosovës e konsideron barazinë gjinore interes nacional dhe strategjik të shoqërisë sonë në rrugën zhvillimit dhe integrimit euro-atlantik”.