Veseli ia lë në dorë Haradinajt pataten e nxehtë

RajoniPress 08:09, 29 Maj, 2017

/ 7 minuta lexim

Qeveria ‘Mustafa’ u rrëzua, me arsyetimin se nuk kaloi Demarkacionin, kurse tani e njëjta parti që edhe ndihmoi rrëzimin e kësaj qeverie, pra PDK, u bë në koalicion me dy nga kundërshtuesit e pandalshëm të së njëjtës çështje (AAK-Nisma), pra të Demarkacionit të nënshkruar nga vetë Hashim Thaçi, ish-kryetari PDK-së dhe ishzëvendëskryeministër e ministër i Jashtëm i Kosovës. PDK-ja u bë bashkë me atë që thotë se ky version i këtij Demarkacioni nuk do të kalojë asnjëherë, ndërkaq kjo lojë e fjalës po vazhdon nga krahu i luftës.

HIPOKRIZIA E PDK-SË ME DEMARKACIONIN

Hertica: Skenaristët e zhurmshëm të rrëzimit të qeverisë do të ndërrojnë lëkurën

“Prej Ramushit nuk pritet konsistencë në qëndrime, pasi që brenda pak muajve kishte vija të kuqe me PDK-në, e pas pak u kurorëzua me një koalicion parazgjedhor të natës, duke u futur nën ombrellën e krimit, korrupsionit, kontrabandës. Një lider, i cili brenda pak kohe ndërron qëndrim, thyen parimet bazike dhe kurorëzohet me një parti, e cila e ka sjellë shtetin në një “vdekje klinike”, është gabimi më i madh që mund t’i ndodhë në karrierën e tij politike”, theksoi analisti Hidajet Ahmeti.

Pyetja tani shtrohet se a do të detyrohet t`i ndërrojë fjalët edhe Ramush Haradinaj, eventualisht nëse arrin ta marrë pozitën e kryeministrit të vendit, dhe a do të pranojë që të votohet, të kalojë me votën e deputetëve të tij në Kuvendin e Kosovës edhe marrëveshja e Demarkacionit për të cilin, vetëm disa muaj më herët, para një viti, bashkë me të gjitha subjektet e tjera politike opozitare, dhe liderët e tyre, nuk kursyen as gazin lotsjellës në Kuvend, apo ndoshta PDK-ja do t`i ndryshojë fjalët që të përcaktohet kundër kësaj marrëveshjeje, derisa tërë kohën e fajësonte partnerin e koalicionit se nuk po e sjell Demarkacionin në Kuvend. Me të drejtë tani dyshohet edhe nga analistët politikë se këto subjekte politike, koalicioni PDK-AAK- NISMA, ose koalicioni PAN, mund të jenë marrë vesh që paraprakisht për ta dërguar çështjen e Demarkacionit në Arbitrazhin ndërkombëtar, gjë që kanë mundur ta bëjnë edhe më herët. Mirëpo, qëllimi përjashtues ndaj një subjekti tjetër politik, në këtë rast kundër LDK-së, tregon më së miri se kjo klasë politike është vetëm një klientelë mashtruese e gënjeshtare për qytetarët, pa dallim, dhe në momentin që e marrin pushtetin edhe i ndërrojnë fjalët e veta vetëm për llogari të pushtetit dhe të zhvatjes që i bëjnë shtetit për përfitime shumë milionëshe!

PAN-i do të jetë koalicion jetëshkurtër

Magjistri i shkencave politike, Ali Hertica, beson fuqishëm, që pikërisht këta skenaristë të zhurmshëm të rrëzimit të qeverisë, me bindjen se kauza e tyre është e drejtë dhe nuk do ta lejojnë ratifikimin e Demarkacionit, nëse arrijnë ta kapin shtetin me një qeveri të përbashkët pas zgjedhjeve të 11 qershorit, do të ndërrojnë 100% në qëndrimet e tyre dhe do të pajtohen jo vetëm për Demarkacionin, por edhe Asociacionin e komunave me shumicë serbe. “Tani koalicioni, pjesë e një spektri të partive politike, që ishin kundërshtues të ratifikimit të Demarkacionit e kanë filluar një dashuri “heleniane” me një subjekt tjetër politik PDK, që ishte edhe kreatori i arritjes së të gjitha marrëveshjeve të nënshkruara në Bruksel me ndërmjetësimin e BE-së edhe me palën serbe. Jam shumë i sigurt që qëndrimet, me kalimin e kohës do të ndryshojnë, dhe të gjitha marrëveshjet e nënshkruara deri më tani do të realizohen, madje pavarësisht se kush do të vijë në krye të qeverisjes së re të vendit. Koha mund të vonojë pak a shumë, por shumë shpejt do të shohim se të gjitha kundërshtimet ndaj marrëveshjeve të deritanishme nuk kanë qenë asgjë më shumë se një patriotizëm i rrejshëm”, theksoi analisti Ali Hertica.

Ai thotë se nëse eventualisht opozita e re nuk i bashkohet koalicionit qeverisës për ta kaluar Demarkacionin, atëherë mund të gjendet alternativa tjetër, dërgimi i të njëjtit në Arbitrazh, por duke e ditur paraprakisht që vendimi i Arbitrazhit do të jetë në favor të Malit të Zi dhe verifikim i versionit të marrëveshjes së tanishme që është kundërshtuar nga treshja opozitare AAK-NISMA ‘VETËVENDOSJE’.

Për analistin Blerim Burjani, është shumë e qartë që koalicioni PAN është koalicion jetëshkurtër, i cili do të shërbejë vetëm sa të finalizohen proceset ë rëndësishme me Demarkacionin dhe Specialen, kurse përfitues nga kjo qeverisje jetëshkurtër do të jenë një grup i caktuar individësh brenda këtyre partive, nëse eventualisht arrijnë të marrin pushtetin.

Ahmeti: Prej Ramushit nuk pritet konsistencë në qëndrime

Analisti politik, Hidajet Ahmeti, vlerë- son se si kabinet qeverisës, qeveria e kaluar nuk kishte vullnetin, guximin dhe dijen për ta përmbyllur çështjen e Demarkacionit dhe përfundoi rreth tri vite të mandatit kushtetues, por nuk arriti ta zgjidhë këtë çështje. Sidoqoftë ai është i bindur që partneri i koalicionit të qeverisë së kaluar, PDK-ja ka qenë pro këtij versioni, së paku deklarativisht, kurse ishte LDKja, e cila nuk mundi të bindë deputetët e saj për ta votuar një version të tillë, prandaj edhe ndodhi skenari i rrëzimit.

Tani, sipas Hidajet Ahmetit, është e pritshme që kjo marrëveshje të marrë bekimin e Kuvendit në përbërjen e re të qeverisë, pasi që lideri i AAK-së, Haradinaj, nuk është personalitet i konsistencës dhe mosndryshimit të parimeve apo qëndrimeve të tija publike. “Prej Ramushit nuk pritet konsistencë në qëndrime, pasi që brenda pak muajve kishte vija të kuqe me PDK-në, e pas pak u kurorëzua me një koalicion parazgjedhor të natës, duke u futur nën ombrellën e krimit, korrupsionit, kontrabandës. Një lider, i cili brenda pak kohe ndërron qëndrim, thyen parimet bazike dhe kurorëzohet me një parti, e cila e ka sjellë shtetin në një “vdekje klinike”, është gabimi më i madh që mund t’i ndodhë në karrierën e tij politike, e një gjë të tillë e bëri Ramushi”, theksoi analisti Hidajet Ahmeti./kosova sot/