Veseli: Gjuriq s’ka pse të merret me Trepçën

Kryetari i Kuvendit të Kosovës, Kadri Veseli ka thënë se çështja e Trepçës është punë e kryer tashmë dhe e ka porositur Drejtorin e Zyrës për Kosovën në Qeverinë e Serbisë që të mos merret më me këtë punë, njofton Klan Kosova.

Gjuriq sot gjatë ditës ka thënë se Serbia do ta mbrojë Trepçën në arbitrazh, por këto deklarata nuk i kanë bërë përshtypje Veselit.

Ai ka thënë për Klan Kosovën se ligji për Trepçën ishte më i miri i mundshëm dhe se është i favorshëm për rifunksionalizimin e gjigantit metalurgjik të Kosovës.

Ndërsa për komentet e Ministrit Serb në Qeverinë e Kosovës Ljubomir Mariq, se lista serbe mund ta braktisë koalicionin qeveritar, Veseli nuk ka komentuar fare.

Këto deklarime, Kryetari i Partisë Demokratike të Kosovës, i ka bërë nga Llapushniku, ku mori pjesë në shugurimin e kishës katolike “Shën Abraham”.