Vendosin shqiptarët: Lapidari nuk largohet, por legalizohet

Në ndertesën e Komunës së Preshevës është mbajtur takimi i liderëve të gjashtë partive politike në të cilin është vendosur që lapidari i UÇPMB-së mos të lëvizet nga vendi, ka thënë Ragmi Mustafa, kryetar i Preshevës.

Pas takimit, Jonuz Musliu, ish përfaqësues politik i UÇPMB-së, ka thënë se në takimin e liderëve shqiptarë është arritur marrëveshja që lapidari i ushtarëve të rënë të UÇPMB-së mos të lëvizet.

“Në takimin e mbajtur në Preshevë kemi shqyrtuar edhe urdhrin e inspeksionit të Ministrisë së Drejtësisë i cili ka arritur në Komunën e Preshevës që lapidari të largohet, në çfarë ne kemi të drejt për ankesë. Komunat në Serbi me ligj kanë të drejt që të legalizojnë përmendoret ne territorin e tyre dhe këtë sot do ta bëjë Kuvendi Komunal i Preshevës“, ka thënë Musliu.

Në pyetjen se a janë të saktë spekulimet se „snajperistët shqiptarë po e ruajnë lapidarin e pjesëtarëve të rënë të UÇPMB-së në Preshevë dhe se a do të ketë reagime në rast se tentohet të rrënohet lapidari“, Musliu ka thënë se të gjitha këto janë gënjeshtra.

„S’ka kurrfarë snajpersitë që e ruajnë lapidari, kjo është gënjeshtër dhe e pavërtetë. Nga ana jonë nuk ka provokime, kjo varet nga autoritetet në Beograd“, ka thënë ai. (ORAinfo)