Vendimi i BE-së ndaj Qeverisë, Hoti: Situata është e tmerrshme, aleatët po humbasin besimin në institucionet e Kosovës

Ish-kryeministri i Kosovës, Avdullah Hoti, ka reaguar pas vendimit të Bashkimit Evropian që të mos zhvillojë takime me kryeministrin në detyrë Albin Kurti dhe kabinetin e tij në objektin e Qeverisë.

Hoti e ka cilësuar këtë gjendje si të tmerrshme, duke thënë se aleatët po shprehin rezerva serioze për legjitimitetin e Qeverisë së Kosovës.

“Sjellja e tillë është pasojë e një lidershipi që interesohet vetëm për interesa elektorale momentale, e jo për interesa shtetërore. Kështu shkatërrohet besimi i aleatëve në institucionet shtetërore të Kosovës,” ka shkruar ai.

Tutje, Hoti ka kritikuar edhe heshtjen e Presidencës, e cila sipas tij ka detyrim kushtetues të garantojë funksionimin e institucioneve.

Ndryshe, në letër drejtuar Kurtit më 8 gusht 2025, shefi i Zyrës së BE-së në Kosovë dhe Përfaqësuesi i Posaçëm i BE-së, Aivo Orav, ka theksuar se ky vendim pason aktgjykimin e Gjykatës Supreme të Kosovës të 25 qershorit, e cila shpalli të pavlefshëm një udhëzim administrativ të Ministrisë së Financave, duke u thirrur në nenin kushtetues që ndalon ushtrimin e njëkohshëm të funksioneve ministrore dhe parlamentare.

“Ky vendim riafirmon përkushtimin tonë ndaj sundimit të ligjit, llogaridhënies demokratike dhe integritetit institucional. Vizitorët e nivelit të lartë nga BE-ja dhe shtetet anëtare përkohësisht do të përmbahen nga takimet brenda ndërtesës së Qeverisë së Kosovës, derisa të formohet një qeveri e re,” thuhet në letrën e Oravit që ka siguruar Telegrafi.