Vendimet e Gjykatave e “sakatojnë” Komunën e Gjilanit

Gjilan – Vetëm gjatë vitit 2013 dy vendime gjyqësore e kanë zbrazur arkën e Komunës së Gjilanit për 373 mijë euro thotë Nuhi Nuhiu drejtor i financave. Këto dënime që po bënë Gjykata i takojnë kohës së Enver Mujit dhe ne do të bëjmë padi në Gjykatë sepse padrejtësisht po i merren të hollat komunës thotë ai.

Dy vendime gjyqësore të ekzekutueshme e kanë zbrazur arkën e Komunës së Gjilanit për 373 mijë euro. Mungesa e këtyre mjeteve të cilat me vendim të gjykatës janë tërhequr nga llogaria e Komunës së Gjilanit e ka dëmtuar tej mase edhe funksionimin e institucioneve komunale thotë për rajonipress , Nuhi Nuhiu drejtor për buxhet dhe financa.

Nuhiu tha se vendimi i parë që e ka zbatuar Gjykata i takon kohës së ish kryeshefit të ekzekutivit Enver Muja. Ky ekzekutim arrin në 43 mijë euro dhe ka të bëjë me një qira që është lidhur mes Mujës dhe NLB Bankës në emër të qirasë mujore.

Në vendimin e Gjykatës Themelore të Gjilanit të cilin e ka siguruar rajonipress është urdhëruar nga ana e gjyqtarit përmbarues Aziz Shaqiri (nga departamenti i përgjithshëm i Gjykatës), Ministria e Ekonomisë dhe Financave – Thesari në Prishtinë që mjetet nga xhiro llogaria e Komunës së Gjilanit në emër të qirasë për shfrytëzimin e lokaleve afariste në lartësi prej 43.999.86 euro të barten në xhirollogarinë e NLB bankës nga Prishtina.

Ky vendim i Gjykatës e ka shokuar drejtorin Nuhiu, por sipas tij nuk është vetëm ky vendim pasiqë një tjetër vendim gjyqësor që lidhet me ish kryetarin e Komunës Xhemajl Hyseni është ekzekutuar këtë të hënë në vlerë të 230 mijë eurove.

Nuhiu tha se ky rast ka lidhje me një shpronësim toke i cili mbi 100 mijë euro i ka marrë qysh para vitit të ri (2012), kurse tani i njëjti person i ka marrë në emër të këtij shpronësimi edhe 230 mijë euro tjera. “Vërtet këto vendime janë të pakuptueshme dhe nëse vazhdohet kështu atëherë Gjilani duhet të punojë vetëm për të shlyer borxhet e pushteteve të kaluara. Ne pos padisë që do ta bëjmë shpejt do të kërkojmë edhe hetime dhe revizion për të gjitha ato lokale afariste që janë dhënë me qira dhe për të gjitha shpronësimet që janë bërë për kohën që po na merren mjetet” tha Nuhiu.

Ndërkaq avokati i Komunës, Bardhosh Dalipi nuk ka dashur të flas me arsyetimin se duhet të marrë leje nga zyra për informim e Kuvendit Komunal e cila sipas tij e ka sugjeruar që mos të flas me mediet për raste të tilla pa u konsultuar me zyrën për informim. /rajonipress/