Nga Bilall Maliqi – Vendimi i fundit i Qeverisë së Kosovës, për t’u aplikuar hyrja në territorin e saj vetëm me tri doza të vaksinimit anti-kovid, ose, në mungesë të vaksinës së tretë, të nxirret testi antikovid, ka shkaktuar pakënaqësi të madhe te shqiptarët e Luginës së Preshevës, të cilët, përkundër lidhjeve të afërta farefisnore që kanë me Kosovën, në theks të veçantë me komunat: Gjilan, Kamenicë, Fushë Kosovë etj., tani me këtë vendim të ngutshëm, pamundëson, apo më mirë të themi po ua shkëputë çfarëdo lidhje me Kosovën, sepse kjo për shqiptarët e komunave tona ka kosto për ta bërë testin antikovid, dhe ata që kanë marrë dozën e dytë, duhet të presin 180 ditë deri te doza e tretë e vaksinës dhe në këtë drejtim pala dëmtuese janë shqiptarët e Luginës, në mesin e tyre studentët të cilët duhet shkuar për t’i ndjekur ligjëratat e tyre në fakultetet përkatëse, lidhjet ekonomike e tregtare, gjë që ky veprim i Qeverisë është një shuplakë kundrejt shqiptarëve të lënë pasdore, në mëshirën e fatit.
Ky vendim skandaloz dhe i ngutshëm, edhe njëherë tregon qartë neglizhencën dhe mosinteresimin shtetëror të Kosovës, duke anashkaluar dhe duke i vë pengesa për hyrje në territorin e saj shqiptarëve të tri komunave tona.
Në vend që Qeveria e Kosovës të interesohet t’u dalë në ndihmë të infektuarve nga këto tri komuna, t’u ndihmojë me barëra esenciale e me resurs mjekësor, ajo po i vendosë bllokadë totale dhe kjo vie në kohën kur kjo pjesë shqiptare po ballafaqohet me një krizë të lartë qoftë ekonomike por edhe shëndetësore.
Nuk është vonë që Qeveria ta tërheqë vendimin dhe t’u mundësohet e lëvizja e lirë shqiptarëve në çdo aspekt të jetës, sepse e ka edhe obligim si moral ashtu edhe shtetëror të jetë sa më afër shqiptarëve si në ndihma materiale, po ashtu edhe në krijimin e kushteve për lëvizje të lirë dhe pa asnjë pengesë shqiptarëve të tri komunave tona./rajonipress/
