Vëllai i Xherdanit rehaton Shaqirin e Dritës

Lojtari që deri dje ishte pjesë e Dritës së Gjilanit, Afrim Shaqiri është duke ia parë hairin djalit të axhës së tij, Erdin Shaqirit.

Ky i fundit është vëllai i Xherdanit, yllit të Bayernit. Ndryshe, Erdini është edhe menaxher i Xherdanit, ndërsa së fundmi atij ia ka parë hairin Afrimi, të cilin nga futbolli i Kosovës e dërgoi në Zvicër. Ai që nga vera është duke luajtur në Nyon (Stadde Nyonnais). “Jam duke luajtur në Nyon. Jam transferuar përkohësisht këtu, derisa rregullova librezën e Zvicrës”, thotë ish-sulmuesi i Dritës.

Ai tregon edhe për Erdinin. “Vëllai i Xherdanit, Erdini si dhe një person tjetër kanë biseduar me drejtuesit e klubit, dhe më pas kam ardhur unë këtu. Deri më tani është duke më shkuar mirë”, shtoi Afrimi.

Nyon momentalisht garon në Ligën e Tretë të Zvicrës, pasi në edicionin e kaluar u largua nga Challenge League (Liga e Dytë).

Afrim Shaqiri shton se falë Erdinit, ai pritet që në janar të kalojë në ndonjë skuadër të Superligës së Zvicrës. Kështu i ka premtuar djali i axhës së tij.

“Erdini është duke kërkuar ndonjë klub për mua në Superligë. Më ka thënë se në janar do të më gjej një skuadër. Emrin e klubit nuk e dimë, vetëm e di se është në Superligë”, theksoi ai. Ndryshe, Erdini është menaxher edhe i Admir Mehmedit, sulmuesit shqiptar të Dynamo Kiev.

Në gjashtë muajt e parë të këtij viti, Samir Ramizi nga Drita u transferua pikërisht te Nyoni. Pas gjashtë muajsh, ai nënshkroi për tre vjet me Servetten, e cila garon në Superligën e Zvicrën. Rrugën e tij, shpreson ta ndjeke dhe ish-bashkëlojtari i tij, Afrim Shaqiri. “Besoj se edhe unë që nga viti i ardhshëm do të luaj në Superligë”, u shpreh ai. (ORAinfo)