Vëllai i kryeprokurorit Sylë Hoxha mbetet në burg

Koordinatorja nacionale kundër korrupsionit, Laura Pula, ka dështuar ta lirojë nga burgu të dënuarin me burgim për korrupsion, Elez Hoxha, vëlla i ushtruesit të detyrës së kryeprokurorit të Shtetit, Sylë Hoxha, shkruan sot Koha Ditore.

Propozimi i saj “për zbutje të jashtëzakonshme të dënimit” është cilësuar si i pabazuar në ligj. Për këtë arsye Gjykata Supreme e Kosovës ia ka hedhur poshtë të martën propozimin e saj. Kësisoj ish-gjyqtari Elez Hoxha, i dënuar për marrje të ryshfetit, do të vazhdojë ta vuajë dënimin prej 4 vjetësh burgim.

Gjykata Supreme e Kosovës ka vlerësuar se vuajtja nga tensioni i lartë i gjakut dhe diabeti nuk është rrethanë e re. Për këtë arsye propozimi nuk ka mbështetje ligjore.

Propozimin për zbutje të jashtëzakonshme të dënimit prokurorja e Shtetit, Pula, ia ka shtruar Gjykatës Supreme të Kosovës më 27 janar të këtij viti.

Është arsyetuar se ish-gjyqtari Elez Hoxha, i dënuar për më 4 vjet burgim për marrje ryshfeti në vlerë mbi 60 mijë euro “vuan nga tensioni i lartë dhe diabeti”. Qëndrimi edhe më tej në burg i Hoxhës, sipas Pulës, do të paraqiste rrezik për të.