Veliu: LDK s`i shmanget zgjidhjes së problemeve

Agim Veliu, nënkryetar i LDK-së i ka thënë “Indeksonline” se partia e tij nuk i shmanget takimeve që kanë për qëllim ta largojnë vendin nga kriza.

​Kryesuesi i Kuvendit, Adem Mikullovci ka thirrur takim konsultativ me partitë politike për ditën e mërkurë, që të diskutohet rreth ditës kur do të vazhdojë seanca konstituive e Kuvendit.

Përderi sa Lëvizja Vetëvendosje e ka mohuar pjesëmarrjen, Lidhja Demokratike e Kosovës do të jetë prezente në këtë takim.

Agim Veliu, nënkryetar i LDK-së i ka thënë “Indeksonline” se partia e tij nuk i shmanget takimeve që kanë për qëllim ta largojnë vendin nga kriza.

“Ato janë çështje të Kuvendit. Sigurisht që LDK-ja nuk ka asnjë arsye që t`i shmanget takimeve për zgjedhjen e problemeve, për daljen nga kriza. Sigurisht do jemi pjesë e takimit”, ka thënë ai.

Kujtojmë se seanca e djeshme konstituive e Kuvendit ishte shtyrë për sot, meqë kishin munguar deputetët e koalicionit PDK-AAK-Nisma. Por, edhe sot këta të fundit nuk kanë marrë pjesë në seancë. Ndërkohë, kreu i PDK-së, Kadri Veseli dje ka deklaruar se mund të ketë një kandidat tjetër nga PAN-i për pozitën e kreut të Kuvendit, vetëm nëse në të njëjtën ditë do të votohet edhe për Qeverinë e Ramush Haradinajt./