Veliu kundërshton idenë për organizimin e dy palë zgjedhjeve njëkohësisht
RajoniPress
15:50, 24 Nëntor, 2016
Shukri Buja, Izmi Zeka, Isni Kilaj janë vetëm disa nga zyrtarët e PDK-së të cilët deklarojnë se organizimi i dy palë zgjedhjeve njëkohësisht është opsion i mirë. Madje, këtë opsion e kanë përkrah edhe përfaqësues të partive opozitare. Mirëpo, kjo ide nuk po gjenë mbështetje tek partia e cila udhëheq me qeverinë. Në LDK thonë se ka disa arsye pse nuk bën të shkohet në dy palë zgjedhje njekohësisht.
Agim Veliu, nënkryetar i kësaj partie thotë se ky opsion nuk është i mirë për shkak se në të kaluarën është dëshmuar se një proces zgjedhor me dy palë zgjedhje karakterizohet më shumë parregullsi.
“Si nënkryetar i LDK-së them se nuk është opsion i mirë, sepse zgjedhjet duhet të mbahen në cikle siç janë të rregulluara. Kemi pasur rastin më mbajte zgjedhje dy palë përnjëherë ka pasur shumë parregullsi. Është vështire me u gjend njerëzit me votu sepse janë katër, pesë flet votime dhe nuk del proces i mirë”, ka thënë Veliu për ‘Indeksonline’.
Poashtu ai thotë se shkuarja në dy palë zgjedhje njëkohësisht jep mundësi më të mëdha për të manipuluar dhe krijon shumë vështirësi për votuesit.
“Ka frikë për manipulime pastaj frika për vota të pavlefshme, hapësira për më shumë manipulime, sepse njerëzit nuk mund të gjendën në katër-pesë fletëvotime. Ne edhe ashtu në zgjedhjet kur po mbahen po kemi shumë probleme sepse po ka vota të pavlefshme. Ne duhet me pranu qe një numër i qytetarëve duhet pranuar se nuk janë shumë të edukuar se si të votohet dhe nuk po gjenden në lista. Ju e dini presionin qe i bëhet votuesve kështu që është shumë problem”, ka shtuar ai.
I pyetur se nëse PDK e shtron këtë kërkesë, Veliu thotë se nëse ndodhë një gjë e tillë, atëherë strukturat e LDK-së: Kryesia dhe Këshilli i Përgjithshëm do të mblidheshin dhe do të diskutonin e pastaj do të dilnin më një qëndrim.
Pranvera e vitit të ardhshëm dhe vera e vitit të ardhshëm thuhet të jenë opsionet më të përshtatshme për organizimin e zgjedhjeve lokale dhe atyre qendrore për një ditë./Indeksonline/
