Velija: Ryshfetin e dhashë me urdhër të austriakëve

Natali Velija ka implikuar kompaninë shtetërore austriake OeSD në skandalin e pasaportave.

Shtetasja gjermane ka thënë se nuk ka bërë asgjë më shumë se zbatimin e urdhrave të austriakëve për dhënien e parave ryshfet për zyrtarë të lartë të Ministrisë së Punëve të Brendshme.

Urdhrin ka deklaruar se e ka me shkrim duke shprehur gatishmërinë që të gjitha dëshmitë, përfshirë transaksionet i ka të mbuluara me dokumente, shkruan koha.

“Një pjesë të shumës së këtyre të hollave ia kam dhënë zyrtarëve të lartë të Ministrisë së Punëve të Brendshme me urdhër të shtypshkronjës austriake e cila ka bërë shtypjen e pasaportave të Kosovës” ka thënë Velija para gjyqtarit të procedurës paraprake, javën e kaluar në Gjykatën e Qarkut në Prishtinë.

Ajo ka refuzuar të tregonte se kujt ia ka dhënë ato me arsyetimin se do t’i rrezikohej jeta.