Vdes përjetësuesi i bombës së Hiroshimës

Skicuesi japonez, Keiji Nakazawa, autor i filmit të animuar autobiografik “Geni i Hiroshimës”, i cili flet për luftën dhe bombën bërthamore t hedhur në Japoni, ka vdekur nga kanceri në moshën 73 – vjeçare, njoftuan mediat japoneze.

I lindur në Hiroshima, Nakazawa ishte gjashtë vjeçar, kur në gusht të vitit 1945 amerikanët lëshuan bombën e parë bërthamore mbi këtë qytet, që shtrihet në perëndim të Japonisë. Si pasojë e shpërthimit të bombës bërthamore u vranë të paktën 140,000 persona, përfshirë këtu edhe babanë, vëllanë dhe motrat e Nakazawa’s. Edhe ai vetë u rrezatua nga shpërthimi bërthamor, njësoj sikurse edhe nëna e tij, e cila vdiq 20 vjet më vonë.

Në filmin “Geni i Hiroshimës”, që është një serial i animuar, që në Japoni është publikuar në disa vëllime, dhe i cili pastaj është përkthyer në 20 gjuhë, Nakazawa tregon se si e përjetoi luftën, bombën, dhe pasojat e saj.

Vepra e animuar konsiderohet si një dëshmi historike, jo vetëm për tragjedinë në Hiroshima, por edhe për gjithë shoqërinë japoneze gjatë dhe pas Luftës së Dytë Botërore.