Vazhdon terri, vazhdon pasiguria, vazhdojnë vjedhjet – komuna nuk vepron

Gjilan – Mërgimtarët po ndihen të trishtuar kur po vijnë në vendlindje. Ata sapo hyjnë në shtëpitë e tyre duhet të kujdesen për sigurinë e tyre, duhet të kujdesen që shtëpitë e tyre mos të plaçkiten dhe duhet të kujdesen edhe për sigurinë e tyre. Krejt kjo ndodhë kur në lagjet e mëdha të qytetit nuk ka ndriçim publik në mungesë të joseriozitetit të drejtorisë së shërbimeve publike e cila nuk ka siguruar operatorin mbikëqyrës.

Mërgimtarët e lagjes së tetë Bajrushi, Ismeti e Hydajeti ka katër ditë që ndodhen në vendlindje. Ata në vend se të ndihen të lumtur e të gëzuar, qysh në start ballafaqohen me problemet më elementare. Ka shtatë ditë që në lagjen e tetë mungon ndriçimi publik. Për këto shtatë ditë kanë ndodhur dhjetëra vjedhje dhe thyerje të shtëpive nga hajnat e natës.

Mërgimtarët nuk e kuptojnë këtë situatë ose këtë neglizhencë të zyrtarëve komunal. “Po ndihemi të rrezikuar, të pasigurt dhe gjithsesi edhe të përbuzur që po sillen kështu me ne” thotë Hydajeti mërgimtar i sapoardhur nga Zvicra.

Mërgimtarët duhet të kujdesen për shtëpitë e tyre, sigurinë e tyre dhe s`kanë guxim të ecin mbrëmjeve.

Në tërë këtë katrahurë që po mbretëron zyrtarët komunal nuk kanë ndërmarrë asnjë hap. Ishte Kushtrim Ibrahimi aktivist nga lagja e tetë që alarmojë zyrtarët komunal, por kërkesat dhe shqetësimet e tyre nuk kanë gjetur mirëkuptim tek zyrtarët e Drejtorisë së Shërbimeve Publike./rajonipress/