Vazhdon realizimi i projekteve në komunën e Vitisë

Viti – Në përfundim e sipër është rregullimi i një pjese të trotuarit në fshatin Beguncë, projekt ky shumë i nevojshëm që lehtëson qarkullimin e banorëve të disa lagjeve në këtë pjesë.

Po ashtu është shtruar me zhavor një rrugë lagjore në fshatin Lubishtë, duke u bërë kjo rrugë më e kalueshme, e cila është iniciuar nga banorët dhe ka gjetur edhe mbështetjen komunale.

Ndërkohë në Ramjan dhe Gjylekarë, kanë përfunduar fushat sportive, të cilat janë shtruar me gomë.

E këto projekte, i ka vizituar të hënën kryetari i komunës Sokol Haliti, për të parë nga afër punimet që janë kryer.

Me këtë rast, ai ka uruar banorët e këtyre lokaliteteve për projektet e realizuara dhe ka theksuar se do të vazhdohet edhe më tej, me projekte të reja./rajonipress/