“Vatra” fton të gjithë qytetarët shqiptarë që të marrin pjesë në marshin protestues për Kosovën Lindore

Gjilan – Deklaratat kërcënuese me urrejtje të paparë kundër shqiptarëve dhe krijimi i psikozës frikësuese për t’u larguar nga trojet e veta, për të hequr dorë nga lufta çlirimtare, për të hequr dorë nga kujtimi edhe i dëshmorëve, për të rrënuar lapidarët e tyre, ka bërë që shqiptarët jo vetëm në Kosovën Lindore, por kudo që janë, të ngritin zërin dhe të dalin në mbrojtje të lirisë, gjakut të derdhur të bijve e bijave më të mira e të tokave etnike shqiptare thuhet në njoftimin e Vatrës.

Shoqata Vatra vlerëson se përveç deklarimeve, takimeve, mbledhjeve, rezolutave, sensibilizimit të situatës të faktori ndërkombëtar e vendor me kërkesa e dokumente tjera, në mbrojtje të të drejtave të shqiptarëve të Kosovës Lindore (Preshevë, Medvegjë e Bujanoc) këto ditë, në diasporë e gjetiu kanë filluar të organizohen edhe protesta me porosi të qartë se shqiptarët janë të gatshëm që të japin gjithçka për të mbrojtur nderin, lirinë dhe tokat shqiptare.

Në vazhdën e kësaj, edhe studentët e Universitetit “Hasan Prishtina” kanë bërë thirrje, që të mërkurën më, 16 janar në ora 12:00, në Prishtinë, të marshojnë paqësisht në mbështetje të shqiptarëve të Preshevës, Bujanocit dhe Medvegjës.

Shoqata “Vatra” me seli në Gjilan, duke pasur parasysh gjendjen e krijuar në Kosovën Lindore dhe duke pas parasysh se shqiptarët atje janë duke iu ekspozuar një terrori të paparë me tentim edhe të rrënimit të lapidarit të ngritur për nder të gjakut të derdhur të dëshmorëve për liri, përkrahë iniciativën e studentëve Universitetit “Hasan Prishtina” dhe do të jetë pjesëmarrëse e këtij marshi duke ftuar të gjithë anëtarët e saj, qytetarët e ndjekur nga Kosova Lindore dhe të gjithë të tjerët, që të marrin pjesë në këtë marsh protestues më, 16 janar 2013 thuhet në njoftimin e sektorit për informim të nënshkruar nga Kushtrim Kadriu /rajonipress/