Valon Zymberi e quan skandaloz vendimin e FFK-së

Drejtori sportiv i Dritës, Valon Zymberi, e quan skandaloz vendimin e Komisionit Disiplinor të Federatës së Futbollit të Kosovës. Ky organ ka dënuar të enjten Zymberin me pretendimin se ka shkelur Kodin e Mirësjelljes Sportive dhe Rregulloren Disiplinore me rastin e prononcimit për media.

Zymberi është gjobitur me 200 euro, ndërsa i është ndaluar kryerja e funksionit për gjashtë muaj. “Çdo vendim që vjen nga Federata e Futbollit e Kosovës nuk përbën më lajm për mua. Drejtuesit e FFK-së e kanë humbur arsyen. Është e turpshme, pasi në vend që FFK-ja të merret me zhvillimin, procesin e garave, kombëtaren, ajo merret me deklaratat e mia. Është e turpshme. FFK-ja ose kryetari Agim Ademi po mendon që është në Korenë e Veriut. Është gabim çka është duke bërë. E inkurajoj t’i thërras mendjes sepse është skandal kjo çka është duke bërë. Është duke e poshtëruar veten, mua nuk mund të më bëj asgjë”, ka thënë Zymberi.