Valixhja e gjyshit

Poezi për fëmijë nga Avdush Canaj

I mori në valixhe
Dy sonata dallëndyshesh
Pak ngazëllim fluturash
Lulet ia falën buzëqeshjen e mëngjesit
Kaprollja e vogël ia dha
Dy përralla të pyllit
Kënga erdhi e qeshur
Me puhinë mes gjethesh
Dy mollë me faqe si të vajzave
Gjetën vend diku
Dhe dy ftoj erëmirë
Me shall hëne
Përqafimet e zemrave
Hyrën pa fjalë
Në mes u ul dashuria e Atdheut
Dhe fluturoi gjyshi
Drejt aeroportit ta gëzoj nipin
Në skaj të skajit të botës.