Valentina premton fuqizim të gruas

Gjilan – Drejtori i misionit të OSBE-së në Gjilan, Ulrich Biffar, i shoqëruar nga përgjegjësja për barazi gjinore Sadete Tërnava, kanë vizituar sot kryesuesen e sapozgjedhur të Kuvendit Komunal të Gjilanit, zonjën Valentina Bunjaku Rexhepi, të cilët i uruan asaj për marrjen e detyrës.

Ata kanë shprehur gëzimin e tyre që në krye të institucionit më të rëndësishëm komunal është zgjedhur një grua.

Zonja Sadete Tërnava kërkoi nga kryesuesja që ta funksionalizoj grupin e grave, duke shpresuar dhe besuar që gruaja të ketë pozitë të rëndësishme në vendimmarrje.

Nga ana tjetër, kryesuesja e Kuvendit Komunal të Gjilanit, Valentina Bunjaku Rexhepi pasi ka falënderuar z. Biffar dhe zonjën Tërnava për vizitën, ka thënë se do të punoj që gruaja të fuqizohet sa më shumë në Gjilan, përderisa për këtë ka marrë garanca nga kryetari i Gjilanit, Lutfi Haziri. /rajonipress/