Valentina Bunjaku kryesuese e Asamblesë Komunale

Gjilan – Me 24 vota për, Valentina Bunjaku nga LDK-ja është zgjedhur kryesuese e Asamblesë Komunale. Bunjaku tha se do të jetë zëri dhe përçuesi pozitiv i tërë punës së asamblesë dhe komiteteve të saj. PDK nuk mori pjesë fare në votim.

Valentina Bunjaku ka të drejtë të ndihet krenare pasiqë është femra e parë në historinë e Gjilanit që do të udhëheq me postin e kryesuesit të Asamblesë Komunale.

Në seancën e së martës me propozimin e Abdyl Aliut shef i grupit të LDK-së, Valentinë Bunjaku-Rexhepi është propozuar si kandidate për kryetare të asamblesë, raporton rajonipress.

Aliu duke e arsyetuar propozimin tha se Valentina Bunjaku ka dhënë një kontribut të madh në demokratizimin e shoqërisë gjilanase dhe është njëra nga femrat më aktive jo vetëm në Gjilan, por edhe në Kosovë.

Këshilltarët e PDK-së ndërkaq nuk kanë marrë pjesë fare në votim pasiqë sipas Sahit Abazit shef i grupit të PDK-së, çështja e kryesuesit i takon partisë në pushtet që ta zgjedhë.

Ndërsa në votim kanë marrë pjesë këshilltarët e AAK-së. Pas hedhjes në votim Valentina Bunjaku ka marrë 24 vota.

Bunjaku para këshilltarëve tha se ndihet e privilegjuar, por edhe me një përgjegjësi shtesë që të udhëheq Asamblenë. “Ju sigurojë se do të jem zëri i juaj dhe do të mundohem të jem një përçues pozitivë i tërë punës së Asamblesë Komunale” tha Bunjaku./rajonipress/