Vakëfet nuk janë pronë të baballarëve të pushtetit!

Bujanoc – I pari i Organizatës së Veteranëve të Luftës të UÇPMB-së, Nazmi Hajredini, vizitoi zyrën e Këshillit të Bashkësisë Islame për Preshevë, Bujanoc dhe Medvegjë, në Preshevë.

Zotëri Hajredini, nga afër mësoi nga kryetari i KBI-së të BIPMB-së, Granit Kamberi, lidhur me skandalin e krijuar rreth pronës së shenjët fetare e cila mbahet e uzurpuar nga pushteti lokal në Preshevë. Gjithashtu, z. Kamberi, sqaroi njoftimin e avokatit, lidhur me pezullimin e procesit gjyqësor, në llogari të Komunës, duke dëmtuar rëndë institucionin fetar, në vlerë prej rreth 300 mijë eurosh.

Nazmi Hajredini, kryetar i OVL-së të UÇPMB-së, shprehu shqetësimin e tij për këtë dukuri negative, që ka përfshirë institucionet e pushtetit lokal.

Ai, nuk ngurroi të thotë se “Vakëfet nuk janë pronë të baballarëve të pushtetit, por prona të shenjta të Bashkësisë Islame, të cilat nuk guxojnë të manipulohen nga askush.

“Ne si OVL, kemi qëndrim të rreptë ndaj këtyre padrejtësive dhe aspak nuk frikësohemi e as nuk ndalemi nga presionet e pushtetit lokal e as ndaj atij qendror”, tha gjatë këtij takimi, z. Nazmi Hajredini, kryetar i OVL-së rë UÇPMB-së./rajonipress/