Ushqimet, të cilat duhet t’i hani gjatë stinës së vjeshtës

Mollët përshpejtojnë punën e metabolizmit dhe ulin kolesterolin e keq, lulelakra pastron helmet prej organizmit dhe forcon imunitetin, si dhe kungulli bllokon shfaqjen e radikaleve të lira.

Mollët

Mollët ndihmojnë në uljen e nivelit të kolesterolit të keq dhe janë të pasura me antioksiduesit kuercetinë, i cili ndihmon në depërtimin e oksigjenit në mushkëri. Po ashtu janë burim i shkëlqyeshëm me vitamina C, të cilat ndihmojnë në forcimin e sistemit imun dhe luftojnë ftohjet. Një mollë e madhësisë mesatare përmban 14 për qind të sasisë së nevojshme ditore me vitamina C dhe rreth 100 kalori, transmeton gazeta Kosova Sot Online.

Lulelakra

Sikurse edhe mollët, lulelakra është e pasur me vitamina C. Mendohet se një porcion përmban rreth 77 për qind të sasisë së nevojshme ditore. Lulelakra është e pasur me antioksidues, që fshijnë edhe rrudhat e po ashtu me fitonutrientet, që ndihmon në luftimin e kancerit në mushkëri. Pikërisht për këtë arsye lulelakra u sugjerohet personave që thithin duhan.

Shega

Kjo pemë pasi që është e pasur me vitamina C, acid folik dhe vitaminat A dhe E, si dhe me kalium, ndryshe e thërrasin edhe super-pemë. Në lëngun e saj gjenden tri polifenole të rëndësishme, që janë antioksidues të fuqishëm, e në bazë të hulumtimeve, lëngu i shegës është më i fuqishëm sesa ai i manaferrave, çaji i gjelbër dhe vera e zezë. Posedon substanca kundër baktereve, mbron nga kanceri dhe shfaqja e diabetit dhe ndihmon në luftë me depresionin.

Kungulli

Është artikull i rëndësishëm për të gjithë ata që vuajnë nga alergjitë. Kungulli është i pasur me vitamina C, zink dhe me vitamina A, të cilët forcojnë sistemin imun të njeriut. Po ashtu, bllokon edhe shfaqjen e radikaleve të lira, duke mbrojtur ADN-në dhe qelizat nga plakja e parakohshme dhe mutacioni, e sidomos u sugjerohet atyre personave që kanë telashe me lukth dhe me zorrë.

Lakra jeshile

Kjo perime është e pasur me vitaminat A, C dhe E, magnez dhe karotenoide, që forcojnë sistemin imun dhe ndihmojnë në forcimin e qimes së flokut. Lakra jeshile pastron helmet nga organizmi, që është e domosdoshme për një organizëm të shëndetshëm. Po ashtu ndihmon në zbutjen e kollës te njerëzit, që vuajnë nga lloje të ndryshme të alergjisë.

Lakra e Brukselit

Kjo perime është burim i shkëlqyer me vitamina A dhe C, proteina, hekur dhe kalium. Po ashtu është e pasur me acid folik, e cila rrit pjellorinë, si te meshkujt po ashtu edhe te femrat. Po ashtu, lakra e Brukselit është e pasur me fitonutriente, që ndihmojnë në rregullimin e nivelit të hormoneve te femrat.

(Kosova Sot)