UP-ja, në duart e politikës dhe klaneve

Zgjedhjet në Universitetin e Prishtinës.Ligji i vjetër mundëson ndikimin e fortë qeveritar

“Nuk është problemi vetëm te politika, por edhe te grupet e interesit, që ekzistojnë brenda UP-së e ku janë të përfshirë profesorë dhe studentë. Këto grupe, jo medoemos të lidhura me politikën, operojnë mbi bazën e këmbimit të favoreve, përfshirë punësimin e miqve dhe familjarëve, avancimin e pamerituar, faljen e notave e deri te regjistrimi i studentëve në mënyrë të paligjshme”, ka thënë eksperti Dukagjin Pupovci

Tash, kur kanë mbetur pothuajse edhe një muaj nga zgjedhja e rektorit të ri, politika ka nisur luftën e ashpër që ta ketë në kontroll Universitetin e Prishtinës, rëndom siç është bërë nga paslufta e deri sot. UP-ja mbetet ende peng i politikës, për shkak të mosmiratimit të Ligjit për arsimin e lartë, ku Këshilli drejtues, i cili nga tetë anëtarët, katër i ka nga politika, sepse i cakton MASHT-i.

Mosmiratimi i këtij ligji ka vënë në pikëpyetje edhe legjitimitetin e rektorit të ardhshëm, i cili prapë do të jetë i zgjedhur nga politika. Njohësi i mirë i arsimit të lartë, Dukagjin Pupovci thotë se nuk është problem në UP vetëm politika. “Nuk është problemi vetëm te politika, por edhe te grupet e interesit, që ekzistojnë brenda UP-së e ku janë të përfshirë profesorë dhe studentë. Këto grupe, jo medoemos të lidhura me politikën, operojnë mbi bazën e këmbimit të favoreve, përfshirë punësimin e miqve dhe familjarëve, avancimin e pamerituar, faljen e notave e deri te regjistrimi i studentëve në mënyrë të paligjshme”, ka thënë ai./kosova sot/