UP-ja dhe Qendra Studentore, në krizë financiare

Universiteti i Prishtinës (UP) “Hasan Prishtina” dhe Qendra e Studentëve gjenden në prag të kapitullimit financiar, pas që sivjet ka hyrë në funksion vendimi i Qeverisë për uljen e tarifave të shkollimit për studentët për 50 për qind në të tri nivelet, si dhe tarifat e banimit dhe ushqimit në Qendrën e Studentëve (QS).

Ky vendim ka përgjysmuar buxhetin e këtyre institucioneve, ndërsa edhe UP-në, por edhe QS-në, i ka vënë në siklet. Brenda muajit këto dy institucione, UP dhe QS, rrezikojnë të bllokohen pasi në kontot e tyre janë hequr miliona euro nga të hyrat, kryesisht pagesa të studentëve.

Në UP, siç thuhet, rrezikohet të mos jepen pagat për profesorët, për muajin tetor, kurse studentëve t’iu shërbehet ushqim dukshëm më i dobët.

Qeveria në kontot e këtyre dy institucioneve nuk ka derdhur mjetet e premtuara për kompensim, por as nuk ka ndonjë vendim se kur do t’iu kompensohen ato. Megjithëkëtë, në Qendrën e Studentëve janë në pritje të kompensimit./zeri/