Universiteti i Gjilanit është i hapur për Luginën e Preshevës

Gjilan – Kryetari i Këshillit Kombëtar Shqiptar (KKSH), Jonuz Musliu, dhe kryetari i Komunës së Bujanocit, Shaip Kamberi, takuan Rektorin e Universitetit të Gjilanit “Kadri Zeka” në Gjilan, Bajram Kosumi.

Gjatë takimit u shtjellua tema e studentëve nga Lugina e Preshevës në institucionin publik të Universitetit “Kadri Zeka”.

Musliu dhe Kamberi kërkuan më tepër fleksibilitet dhe mirëkuptim për gjendjen e cila po mbretëron në Luginën e Preshevës, përkatësisht edhe me regjistrimin e studentëve të rinjë nga ky rajon. Njëkohësisht, kërkuan edhe trajnimin dhe aftësimin e mësimdhënësve nga Lugina e Preshevës nga profesorët eminent të edukimit.

Rektori Bajram Kosumi theksoi se ky universitet është i hapur për shqiptarët e Luginës së Preshevës edhe më tej mbetet i hapur për studentë nga ky rajon nga se ka vende të lira dhe mund të regjistrohen edhe më tej sipas konkursit në të gjitha njësitë akademike të këtij institucioni.

Vlen të theksohet se është dakorduar që bashkërisht të organizohet trajnimi i mësimdhënësve nga Lugina e Preshevës që nga tetori me profesorët nga Fakulteti i Edukimit të Universitetit të Gjilanit./rajonipress/