Universitetet e lodhëta

Mosakreditimi i tri universiteteve publike në Kosovë nga Këshilli Shtetëror për Cilësi (KSHC) do të duhej të shërbente si alarm për cilësinë e dobët në këto institucione publike arsimore dhe jo të lëshohen akuza të rënda nga qeveritarët në drejtim të anëtarëve të Këshillit. Kështu vlerësojnë ekspertët e arsimit në vend një ditë pas vendimit të KSHC-së, ku Universitetit “Ukshin Hoti” në Prizren, Universitetit “Haxhi Zeka” në Pejë dhe Universitetit “Isa Boletini” në Mitrovicë nuk do t’u lejohet regjistrimi i studentëve të rinj, shkruan sot Gazeta “Zëri”.

Duke u bazuar në rekomandimet e raportit të ekspertëve ndërkombëtarë për tërheqje të akreditimit institucional, përveç universiteteve publike, KSHC-ja ka marrë vendim të mos i akreditojë edhe disa institucione private si: “Fama”, “Iliria”, “Tempulli” dhe “Kosova Art Academy”, ndërsa kolegji “Biznesi” dhe “Juridica” nuk kanë aplikuar fare, që nënkupton se nuk do të kenë akreditim gjatë këtij viti.

Shefi i Qeverisë, Ramush Haradinaj, ka reaguar ashpër ndaj vendimit të fundit të KSHC-së, duke akuzuar se ka dallavere dhe mafi në këtë institucion, shkruan më tutje Gazeta “Zëri”.

Pas këtyre akuzave është kundërpërgjigjur KSHC-ja nëpërmjet një komunikate për medie, duke deklaruar se janë të shqetësuar, siç kanë thënë ata, për manipulimin e opinionit publik dhe përdorimin e vendimeve të tyre për lojë politike.