UNDP mirënjohje Gjilanit për luftim të korrupsionit

Gjilan – Programi i Kombeve të Bashkuara për Zhvillim në Kosovë (UNDP), i ka ndarë mirënjohje Komunës së Gjilanit për partneritetin 3-vjeçar në luftim të korrupsionit.
Mirënjohjen ia ka ndarë kryetarit të Komunës së Gjilanit, Lutfi Haziri, koordinatori i UNDP-së për Kosovë, Andrew Russell.

Kryetari Haziri e ka falënderuar z. Russell për këtë vlerësim, duke thënë se që nga marrja e mandatit të kryetarit po qeverisë me Gjilani me duar të pastra dhe dyer të hapura për qytetarët.

Haziri theksoi se për të parandaluar korrupsionin e mundshëm ka dhënë në dispozicion 2 mijë euro për çdo qytetar që e lajmëron këtë dukuri dhe ai mbetet anonim.

Haziri tha se me këta hapa që i ka ndërmarrë ai në parandalimin e korrupsionit të mundshëm, investitorët e huaj do të mund të investojnë në Gjilan pa dilema.

Ndryshe, Komuna e Gjilanit, në mbështetje të UNDP-së, e ka hartuar Planin për Integritet, sikurse që e ka miratuar në Kuvend edhe planin strategjik për trajtimin dhe parandalimin e korrupsionit./rajonipress/