Ujkani: Nuk i kemi 61 vota për konstituimin e Kuvendit, na duhet bashkëpunim

Deputetja e Lëvizjes Vetëvendosje, Fjolla Ujkani ka deklaruar se ky subjekt politik nuk i ka 61 votat e nevojshme për konstituimin e Kuvendit të Kosovës dhe zgjedhjen e kryeparlamentarit.

Ujkani në Tëvë1 ka theksuar se për këtë arsye LVV-ja ka tentuar dhe është duke vazhduar të kërkojë bashkëpunimin e partive tjera politike.

“Ne secilën herë jemi duke shkuar në Kuvend për të zhbllokuar procesin actual. Është e vërtetë që ne kemi dalë parti e parë, parti fituese por për të konstituuar Kuvendin dhe për të zgjedhur kryetarin e Parlamentit neve na duhen 61 vota dhe këto 61 vota nuk i ka Lëvizja Vetëvendosje, pra nuk e kemi shumicën absolute. Ne i kemi 48 deputetë nuk kemi as më pak, as më shumë. Nga këto i bie që ne kemi nevojë që të kemi një bashkëpunim edhe me partitë e tjera politike gjë që ne kemi tentuar ta bëjmë, por ato nuk janë përgjigjur pozitivisht dhe nuk duhet që ky ngërç dhe kjo bllokadë të shkaktohet vetëm për inate politike”, është shprehur Ujkani.