Ueb-faqet e komunave – sa për sy e faqe!

Nga Betim Osmani – Riorganizimi dhe mirëmbajtja e ueb-faqeve zyrtare të Komunave të Kosovës është e domosdoshme për informimin e gjithë qytetarëve brenda dhe jashtë Republikës së Kosovës, por edhe për shtetasit e huaj. Aktualisht të gjitha komunat e Kosovës posedojnë ueb-faqe me dizajn të standardizuar. Disa mirëmbahen rregullisht dhe disa nuk freskohen me informacione të reja, në baza ditore. Ueb-faqet zyrtare të komunave janë edhe pasqyra e vendit.

Për shkak të specifikave që disa nga komunat tona kanë, ueb-faqet aktuale nuk përshkruajnë situatën reale. Disa shembuj konkretë ku mungojnë edhe të dhënat bazike: 1) seksione të veçanta për turizmin dhe vizitorët, 2) përkthimet në gjuhët që figurojnë nëpër ueb-faqet zyrtare të komunave; 3) shërbimet online; 4) seksione të veçanta për aktivitetet kulturore duke përfshirë kalendar mujor të aktiviteteve, 5) adresa për të bërë ankesa në formë elektronik, etj.

Mangësitë janë evidente, sa për ilustrim: 1) Komuna e Prishtinës – kryeqyteti i Kosovës, pothuajse asgjë nuk është përkthyer në gjuhën angleze; 2) Komuna e Gjilanit – përkthimi i fundit në gjuhën angleze daton nga fillimi i vitit 2012; 3) Komuna e Gjilanit – edhe pse planet rregullative janë aprovuar nga Kuvendi Komunal i Gjilanit në Maj 2013; ato akoma mungojnë në ueb-faqen zyrtare; aty figurojnë planet e vitit 2011; 3) Komuna e Ferizajt – përkthimi i fundit në gjuhën turke daton nga viti 2009; 4) Komuna e Parteshit – edhe pse kjo komunë është themeluar me 19 gusht 2010; në ueb-faqen zyrtare akoma mungojnë përkthimet në gjuhen shqipe, përfshirë këtu gjeografinë, historinë, kulturën dhe shumë seksione tjera; 5) Komuna e Prizrenit – asnjë lajm nuk është përkthyer në gjuhën angleze.

Shoqëria Kosovare gjithnjë e më shumë është përfshirë në përdorimin e teknologjisë informative. Kjo do të thotë që edhe institucionet duhet të avancojnë format e komunikimit me qytetarët duke përqafuar teknologjitë e reja, e-Komuna, në shërbim të qytetarëve. Mos nxitja e zhvillimit të teknologjisë së informacionit e shof si një tregues i mungesës së përgjegjësisë ndaj qytetarëve. Duhet të jetë dikush në institucione që kontrollon cilësinë e ueb-faqeve – nëse jo, duhet të themelojnë organizëm për të siguruar cilësi.

(Autori është gjilanas)