Semestri veror i vitit akademik, 2015/2016, e karakterizon UBT-në me staf të përforcuar akademik e profesional. Disa nga përforcimet akademike vijnë me doktorata nga shtetet më të zhvilluara të botës, siç është Japonia.
Përforcimit i ka kontribuuar edhe serioziteti dhe përkushtimi ndaj aktiviteteve akademike, arsimore-edukative në UBT, prej themelimit, 15 vjet më parë.
Këtë fakt e ka pohuar vetë rektori i këtij institucioni të lartë profesional, prof. dr. Edmond Hajrizi, sipas të cilit përforcimi i stafit ka qenë dhe mbetet strategji e UBT-së.
Sipas tij, qëllimi është që krahas shtimit të vazhdueshëm për çdo vit e më shumë të numrit të studentëve në fakultetet ekzistuese, të shtohet edhe infrastruktura, stafi akademik e profesional dhe gjithçka që shkon në favor të studentëve.
“Gjithnjë po e shtojmë cilësinë akademike”, ka thënë Hajrizi, teksa për të pranuarit në stafin e ri akademik ka thënë se i kanë mbaruar studimet në universitetet më prestigjioze të botës dhe se kanë përvojë të lartë profesionale.
Rektori ka treguar se pranimi i stafit të ri akademik do të vazhdojë tutje, sidomos në programet e reja në të cilat UBT ka aplikuar për akreditim.
Hajrizi vë në pah se me këtë po shtohet stabiliteti dhe nxjerr elemente të rëndësishme për institucionin që ai e drejton.
“Bashkëngjitja në rrugëtimin tonë akademik është një konfirmim se shoqëria kosovare po e pranon UBT-në si institucion serioz i arsimit të lartë, që kontribuon në zhvillimin e përgjithshëm shoqëror”, ka theksuar rektori për të sqaruar se këto elemente janë përparimtare.
“Janë mesazh njohjeje e motivimi, që ne të punojmë edhe tutje në të gjitha rrafshet, sidomos në shkencat ekzakte, si inxhinieri, shkenca të jetës, teknologji, shëndetësi etj.”, përfundoi rektori Hajrizi.
