UBT dhe Universiteti i Minho nënshkruajnë marrëveshje strategjike për bashkëpunim akademik

Si pjesë e agjendës së vizitës në qytetin historik të Braga-s, Rektori i UBT-së, Prof. Dr. Edmond Hajrizi, dhe Rektori i Universitetit të Minho-s, Prof. Dr. Rui Vieira de Castro, nënshkruan një marrëveshje me qëllim të forcimit të bashkëpunimit mes dy institucioneve.

Marrëveshja synon të promovojë shkëmbimin e studentëve të ciklit të parë dhe të dytë, duke u ofruar atyre mundësi për përvoja akademike dhe kulturore nga të dyja universitetet. Po ashtu, ajo parashikon mbikëqyrjen e përbashkët të tezave të masterit, nxitjen e hulumtimeve dhe avancimin e inovacionit në fushat përkatëse.

Një element kyç i marrëveshjes është zhvillimi i përbashkët i planeve dhe kurrikulave të programeve me interes të përbashkët, në përputhje me politikat zhvillimore dhe kërkesat e tregut.

Të dy rektorët u zotuan të angazhohen për krijimin e një partneriteti të qëndrueshëm dhe të frytshëm, që do të sjellë përfitime të ndërsjella për studentët dhe stafin akademik të dy institucioneve.