U “refuzuan”, kërkojnë hetim në ASHAK

Dy degë të Institutit Albanologjik të Prishtinës (IAP), Gjuhësi dhe Letërsi, u kanë dërguar letër të hapur Parlamentit dhe Qeverisë së Republikës së Kosovës, në të cilën kanë kundërshtuar përzgjedhjet e fundit që ka bërë Akademia e Shkencave dhe e Arteve e Kosovës (ASHAK).

Nga ana tjetër, sekretari i Seksionit përkatës në ASHAK, Mehmet Kraja, ka theksuar se zgjedhjet në Akademi ende nuk kanë përfunduar.

“Ato janë në proces dhe duke u zhvilluar sipas të gjitha normave ligjore dhe rregulloreve në fuqi”, është shprehur Kraja për “Koha Ditore”.

Megjithëkëtë, përgjegjësit e degëve të IAP-it u kanë bërë thirrje institucioneve më të larta të vendit, por edhe MASHT-it, që të ndërhyjnë urgjentisht në këtë “katrahurë e imoralitet” dhe të vendosin ligjin e rendin në ASHAK.

“Nga institucionet përkatëse të Kosovës kërkojmë të formohen komisione të auditimit dhe të bëjnë ekspertizën e duhur profesionale, ku për shkeljet e rënda ligjore e morale në ASHAK, shumë punë do të kishin edhe gjykatat”, thuhet në kërkesën e dy degëve të pakënaqura me pranimin e anëtarëve të rinj në ASHAK dhe refuzimin e disa të tjerëve.

Ata konkursin e fundit të ASHAK-ut për anëtarë të tij e kanë vlerësuar “krejtësisht të dështuar dhe të manipuluar”. Kanë kërkuar ekspertizë edhe të komisioneve ndërkombëtare për vlerësimin e kandidatëve.

“Kjo nuk mund të quhet përzierje në punët e Akademisë, ngaqë institucionet dhe shkencat janë jo vetëm kombëtare, por edhe ndërkombëtare”, kanë shkruar ata në një letër të përbashkët drejtuar institucioneve të sipërpërmendura dhe u kanë kërkuar kryetarit të Parlamentit të Kosovës, Jakup Krasniqi, kryeministrit Hashim Thaçi, dhe ministrit të MASHT-it, Ramë Buja, që të kujdesen për ASHAK-un.

“Vendosni ligjin funksional në këtë institucion tanimë të degraduar, çlirojeni ASHAK-un nga ata bajraktarë uzurpatorë që në veprimtarinë e tyre aty udhëhiqen nga voluntarizmi primitiv, dhe kthejani dinjitetin shkencës dhe arteve tona për të mirën e shoqërisë sonë. Akademia është gjëja më e shtrenjtë dhe më e shenjtë e popullit, e kombit tonë, është kryeinstitucioni ynë kombëtar. Si e tillë, Akademia është për gjithë kombin, jo për grupime të caktuara klanore e krahinore, e mu për këtë duhet të absorbojë studiuesit dhe artistët më të mirë që kemi”, kanë shkruar ata.

Në letrën në të cilën janë nënshkruar Ragip Mulaku për Degën e Gjuhësisë dhe Emin Kabashi për Degën e Letërsisë, pos që e kanë quajtur ASHAK-un si Kuti e Pandorës, e kanë vlerësuar atë edhe të korruptuar.

“Si mund ta arsyetojnë zotërinjtë e Akademisë nga Seksioni i Gjuhësisë dhe i Letërsisë refuzimin e kandidaturave të tilla: Agim Vincës, Shefkije Islamajt, Qemal Muratit, me një mal veprash eprore nga fushat albanologjike, që nuk i kanë as anëtarët e brendshëm të ASHAK-ut së bashku, dhe nga ana tjetër të nominojnë e të pranojnë të tjerë me CV krejt të papërfillshme”, është shkruar në letër dhe është shtuar se derisa të sundojë kjo gjendje, degët e Gjuhësisë dhe të Letërsisë të Institutit Albanologjik do të jenë të detyruara të ndërpresin të gjitha komunikimet me ASHAK-un.