Turqit shtrojnë iftar për mijëra qytetarë të Luginës

Rreth dymijë qytetarë të Komunës së Bujanocit e më gjerë të hënën morën pjesë në iftarin e shtruar nga bashkia Bajramapasha e Stambollit në fshatin Tërnoc të Bujanocit.

Përfaqësues nga ambasada e Turqisë, organizatës turke për zhvillim TIKA dhe Qendrës Kulturore “Yunus Emre” në Beograd, Sulejaman Uglanin nga Novi Pazari e përfaqësues të pushtetit lokal e fetar të Luginës, ishin të pranishëm në këtë organizimin e përbashkët “Karvani i Bereqetit”, nën moton “Vëllazëria nuk njeh kufi”.

Kreu i bashkisë Bajrampasha, Atilla Aydiner i pwrshëndeti të pranishmit duke ju përcjellë edhe porosit e presidentit të Turqisë dhe shprehu bindjen për përkrahjen e projekteve të këtilla në të ardhmen.

“Ju përgëzojë për këtë iftar dhe gjithashtu falënderoj kryetarin e Bajrampashës për një organizimit të tillë dhe ju urojë një Ramazan dhe Bajram të këndshëm”, theksoi ambasadori i Turqisë në Beograd, Mehmet Kemal Bozay, raporton Titulli.com.

Sulejman Uglanin nga Novi Pazari të pranishmëve ju drejtua në gjuhën shqipe duke i falënderuar për nderin që po bënë në vëllazërimin e shqiptarëve dhe boshnjakëve.

Kryetari i komunës së Bujanocit Nagip Arifi tha se është një ditë e madhe për komunën tonë dhe se na kanë nderuar të gjithë me pjesëmarrjen.

Gjatë këtij organizimi të iftarit u shfaq edhe një program i pasur kulturoro-artistik me motive të kulturës Islame dhe asaj turke.

“Karvani i Bereqetit” ka vizituar qytetet të ndryshme në Ballkan duke filluar nga Kroacia, Bosnje e Hercegovinë, Malin e Zi, Kosovë, Shqipëri dhe Maqedoni, ndërsa pas Bujanocit rrugëtimin do ta vazhdojë edhe në Bullgari e Greqi. /Titulli.com/