Turqit, 1 mln euro për Loret Sadikun

Loret Sadiku është shndërruar në një nga mbrojtësit më të kërkuar në Europë.

Lojtari i Kombëtares së Shqipërisë dhe njëherësh i Përfaqësueses së Kosovës do të largohet nga skuadra aktuale, Helsingborg, gjatë afatit kalimtar të verës, duke qenë se i përfundon kontrata në fund të vitit dhe nuk ka pranuar që ta rinovojë.

Së fundmi në dyert e klubit ka trokitur menaxheri i Sadikut, Hasan Çetinkaja, i njohur në Skandinavi për lëvizjet e shumta drejt Turqisë dhe anasjelltas. Ai ka vënë në tryezën e presidentit të Helsingborgut një ofertë prej 1 milion eurosh nga klubi i Mersin Idmanyurdut, i cili sapo është ngjitur në elitën e futbollit turk.

Lajmi është bërë i ditur nga mediat suedeze (Sportbladets), sipas të cilave, klubi i Sadikut është tunduar nga oferta, ndaj me gjasa bisedimet do të vijojnë për mbylljen e saj.