Turqia dhe shqiptarët

Nga Shefik Sadiku – Titulli i lartshënuar vetvetiu paraqet një temë shumë të gjërë, për të cilën as nuk kam qëllim ta shtjellojë,as nuk kam dije të duhur akademike ta shterrojë. Nga shkrimet e shumta në rrjete sociale,media e portale krijohet përshtypja sikur ekziston një qendër e mirëorganizuar antishqiptare që jo pa qëllim dhe jo rastësisht fokus të saj ka sulmet mediatike kundër gjithçkaje që ka të bëjë me Turqinë. Këto sulme antiturke nisen nga koha e Perandorisë Otomane, pavarësisht se Turqia e sotme është diçka tjetër, e vazhdojnë deri në Turqinë e ditëve tona, duke mos dhënë fare argumente, por vetëm nga fakti se dikur Perandoria Oromane ka qenë fuqia kryesore në këto vise, për rrjedhojë edhe viset shqiptare ishin pjesë e asaj Perandorie.

Shtrohet pyetja pse shqiptarët ose dikush në emër të tyre, pa reagimin e vetë atyre, u dashka ta ngjalli urrejtjen ndaj turqve dhe Turqisë së sotme edhe pse shqiptarët më tepër se 100 vjet janë të pavarur nga ajo Perandori ?

Nisur nga ky mentalitet anakronik, antihistorik, antidialektik, antilogjik, shqiptarët tani u dashka të deklarohen kundër dhe të ndërpresin çdo lidhje, qoftë edhe ekonomike me gjithë ata që rrjedhin nga Perandoria Romake, ajo Bizantine, Sllave, pastaj me pushtuesit italianë, gjermanë, serbë, grekë, malazias, maqedonas !

Çuditërisht këta trumbetues flasin dhe shkruajnë aq shumë kundër Turqisë sa të krijohet përshtypja se ne shqiptarët sot problemet dhe pengesat më të mëdha i kemi nga turqit dhe Turqia e jo nga serbët e Serbia, nga grekët e Greqia, nga malazezët e Mali i Zi, nga maqedonasit e Maqedonia. Këta do ta kundërshtojnë mendimin tim duke më sulmuar se gjoja unë qenkam kundër fqinjëve tanë të apostrofuar. Jo, sot qenien shqiptare e kontestojnë dhe e luftojnë qarqet shoveniste serbe, greke, malaziase, maqedone. Pse ?

Sepse këto regjime sot nën sovranitetin e tyre kanë pjesën më të madhe të tokave shqiptare. E keqja është se etnia shqiptare brenda këtyre shteteve është ose kategori e dorës se tretë e të pestë ose fare nuk trajtohet si etni. Sa për krahasim vetëm le të shikohen të drejtat e pakicave serbe, greke dhe malaziase në Kosovë dhe Shqipëri. Këta hygjymtarët antiturk dhe antiturqi sa janë duke luftuar kundër klimës aspak të favorshme për investitorët e huaj në tokat shqiptare?

Sa po luftohet haraçi, mafia, korrupsioni, pasiguria, keqmenaxhimi te ne ? Askush nuk mund të na bind me asgjë se Turqia e sotme është më armiqësore se Serbia Greqia, Mali i Zi, Maqedonia kundër shqiptarëve dhe kundër Shqipërisë dhe Kosovës. Kundërshtarët e bashkëpunimit dhe marrëdhënieve shqiptaro-turke nisen edhe nga fakti se Turqia dhe turqit me shumicë janë të besimit islam. Është e vërtetë kjo, por ne shqiptarët as s’mund ta fshehim besimin tonë, që po ashtu me shumicë jemi muslimanë, as Evropa nuk e kërkon këtë nga ne. Edhe në Turqi ka besimtarë të besimeve të ndryshme. Besimi, në fund të fundit, është çështje personale.

Asnjëri nga besimet monoteiste nuk është produkt i yni, ato i kemi marrë nga tjerët. Thirrjet e atykëtushme që shqiptarët ta ndërrojnë besimin, janë jo vetëm të rrezikshme, por edhe kundërproduktive sepse mund të sjellin thyrje brendashqiptare në krahasim me bashkëjetesën, harmoninë, tolerancën, mirëkuptimin dhe pranimin e njëri tjetrit ashtu siç janë. Dyshoj në sinqeritetin patriotik të trumbetuesve shqiptarë që bëjnë thirrje për refuzimin tonë të miqësisë, ndihmës dhe bashkëpunimit që vjen nga Turqia.

Kundërshtarët tanë, sidomos Serbia dhe Maqedonia, bëjnë çmos të kenë sa më shumë lidhje dhe marrëdhënie me Turqinë, kurse dikush nga ne bën thirrje krejt anakronike. Bashkëpunimi ynë nuk është kundër askujt, është në të mirën tonë. Deshëm ne apo nuk deshëm, Turqia e sotme është fuqi ekonomike, ushtarake, diplomatike, strategjike në Mesdhe. Asnjë e mirë nuk vjen për shqiptarët nga armiqësia me Turqinë. Përkundrazi mund të kemi ndihmë siç kemi pasur shpeshherë në historinë më të re. Të kujtojmë rrezikun që mund t’i vinte Shqipërisë më 1997 pa reagimin e Turqisë dhe ndihmën,po ashtu të Turqisë për shqiptarët e Kosovës jo vetëm si anëtare e NATO-s.