Turizmi kthehet në normalitet, Shqipëria pret mbi 1 milion vizitorë në janar-prill

Mbi 1 milion të huaj kanë hyrë në Shqipëri në 4 muajt e parë të vitit, ku numri më i madh është shënuar në muajin prill me 40 për qind të totalit.

Shifrat tregojnë se pandemia Covid-19 po lihet pas, dhe lëvizja e lirë po kthehet në fazën normale, të ngjashme me atë të vitit 2019.

Të dhënat e Institutit të Statistikave INSTAT tregojnë se vizitorët u rritën ndjeshëm në prill, muaj që përkon me rritjen graduale të temperaturave, njëherësh edhe me heqjen e masave anti-COVID.

Në krahasim me të njëjtën periudhë të një viti më parë, kur pandemia ishte në kulmin e vet dhe lëvizjet vijonin të ishin të kufizuara, hyrjet e të huajve në vend janë rritur me 42 për qind.

Rritja është ndikuar nga shtimi i ndjeshëm i hyrjeve nga të gjitha shtetet, me përjashtim të Kosovës, që ra me gati 14 për qind. Hyrjet nga Greqia u gjashtëfishuan, teksa në të njëjtën periudhë të një viti më parë ishin pothuajse të paralizuara. Shtetasit nga Italia pothuajse u trefishuan, nga Spanja u pesëfishuan, nga Anglia u gjashtëfishuan.

Pjesa më e madhe e vizitorëve kanë ardhur nga rajoni, fluks të shtuar ka pasur nga Britania e Madhe, ndërsa polakët janë rikthyer si tre vjet më parë.

Pjesa më e madhe e vizitave në muajin prill ishin për qëllime turizmi.

Në krahasim me vitin e kaluar, janë shtuar hyrjet nga aeroporti, ndërsa rrugët tokësore dhe detare kanë pasur të një fluks të ngjashëm vizitorësh. /Telegrafi/