Tuna imazh i KTZ, brendit të Rihannas e Jay Z

Teksa këngëtaret dhe artistet tjera po bëjnë fotosesione me Fadil Berishën dhe për kreacione mode në Kosovë, është superylli shqiptar, Tuna, që po bëhet imazh i kompanisë me renome botërore, KTZ.

Lajmi i madh u dha në emisionin Prive, ku është raportuar se Tuna do të realizojë një foto-sesion dhe do të jetë imazh i koleksionit të ri të një prej brendeve më me renome në botë, KTZ. Më pas ky informacion u konfirmua nga vet artistja e cila të martën realizoi sesionin, transmeton Indeks.

Tuna edhe më parë ka qenë e admiruar nga ky brend, ku në rrjetet sociale KTZ ka postuar rregullisht fotografi të këngëtares nga klipi “MMV”, e krahas saj edhe të superyjeve botërore, Rihannas dhe Rita Orës, me veshjet e kësaj marke.

Por, si duket ky brend nuk ka vendosur të ndalet me kaq, dhe ka ftuar këngëtaren shqiptare që ajo të jetë imazh i koleksionit të ri dhe të realizojë një fotosesion profesional me ta.

Kontakti me menaxhmentin e këngëtares ka qenë i pamundur të arrihet, teksa fotot në Instagram janë dëshmi se jo rastësisht Tuna po gjendet në Londër. Bashkë me të në këtë fotosesion do të jetë edhe hip hop ylli i Babastars, Cozman i cili do të marrë pjesë po ashtu në një prej fotosesioneve.

Në faqen e KTZ-së mund të shihen edhe fotografi të Rihannas dhe Rita Orës, teksa edhe Jessie J dhe Katy Perry furnizohen nga ky brend veshjesh, ashtu sikurse edhe ASAP Rocky, Kanye West dhe Jay Z.

Deri tani ky është suksesi më i madh për një artiste shqiptare të dalë nga industria e muzikës shqiptare, sa i përket depërtimit në industrinë ndërkombëtare të modës dhe të shou biznesit. /Telegrafi/