Trusti: Plus 67 milionë euro nga investimi i mjeteve më 2014

Bordi Drejtues dhe Menaxhmenti i FKPK-së për çdo vit ua komunikon kontribuuesve dhe publikut të dhënat përfundimtare të performancës të vitit paraprak që janë në interesin e tyre. Duhet nënvizuar faktin se vendimmarrja e Bordit dhe Menaxhmentit të FKPK-së është në kuadër të ligjeve dhe rregulloreve në fuqi, përmes të cilave institucioni themelues (Kuvendi i Kosovës) dhe ai mbikëqyrës (Banka Qendrore e Kosovës) përcaktojnë kornizën e mbrojtjes së interesit të kontribuuesve.

Vlerësuar në përgjithësi, 2014-ta i shtohet rreshtit të viteve të suksesshme të FKPK-së, si në aspektin e investimeve po ashtu edhe në atë të operacioneve.

Investimet

Bordi Drejtues vlerëson se performanca e fondeve të investuara është shumë e kënaqshme për vitin 2014. Kthimi bruto nga investimet ishte rreth 67 milionë euro, ose 6.3%. Në këtë rezultat vazhduan të kontribuojnë më shumë investimet në tregun e aksioneve, kjo falë performancës së mirë të këtij tregu, kryesisht në SHBA dhe BE, por edhe kontributit pozitiv që dha strategjia e re investuese. Kjo e fundit e uli luhatshmërinë e investimeve dhe e zvogëloi riskun nga një fond investues në tregun e aksioneve (Vanguard), duke e përgjysmuar kontributin dhe riskun e këtij fondi në performancën e investimeve. Zbatimi i plotë i strategjisë së re investuese ka çuar në shtimin e gjashtë fondeve të reja investuese dhe investimin dhe plasimin e mbi 300 milionë eurove.

Vlen të përmendet se tregjet financiare njohën oscilime të forta veçanërisht në tremujorin e fundit të vitit, kur rënia e shpejtë e çmimit të naftës, rishfaqja e problemeve të rritjes ekonomike në eurozonë, tensionet në ngritje kundrejt Rusisë, si dhe problemet me rritjen ekonomike në Japoni e vendet në zhvillim, ishin dekurajuese për investitorët. Megjithatë, në anën tjetër, ky ishte edhe vit rekord i rikuperimit të tregjeve, të nxitura nga shenjat e konsolidimit të shpejtë të ekonomisë amerikane – sidomos në gjysmën e dytë të vitit, rezultateve pozitive të korporatave globale, por edhe masave stimuluese që Bashkimi Evropian dhe Japonia i dhanë ekonomive përkatëse.

Marrë në total, për tri vjetët e fundit vlera e mjeteve pensionale nga investimi i tyre është rritur bruto për 192 milionë euro. Në këtë shifër (pra 192 milionë euro) investimet në tregjet globale financiare kanë kontribuuar me 98.5% ndërsa investimet në Kosovë me 1.5%.

Kontributet e akumuluara dhe llogaritë e kontribuuesve

Kontributet pensionale edhe gjatë vitit 2014 vazhduan rritjen duke kapur shifrën vjetore prej 129 milionë euro kontribute të arkëtuara (2013: 119 milionë euro), ose 10 milionë euro më shumë sesa më 2013. Sa i përket numrit të përgjithshëm të llogarive të kontribuuesve më 2014 ai arriti në 477 mijë, nga 447 mijë një vit më parë. Ndërsa numri i kontribuuesve që gjatë vitit 2014 ishin aktivë, pra për të cilët janë realizuar pagesa të kontributeve pensionale gjatë vitit, arriti në 286 mijë, një rritje kjo prej 3% krahasuar me 277 mijë në vitin paraprak.

Në ndërkohë, kostoja e operimit (taksa operacionale) i kushtoi 0.13% kontribuuesve në vitin 2014; ndërsa pjesa tjetër (prej 0.50%) ishte tarifa që shkoi për investimin e mjeteve në tregjet financiare.

Mjetet nën menaxhim

Mjeteve nën menaxhim prej 914 milionë eurove në fund të 2013-s iu shtuan më 2014 rreth 67 milionë euro prej kthimit bruto nga investimet, dhe 129 milionë euro nga kontributet vjetore të akumuluara; ndërsa iu zbritën rreth 14 milionë euro për pensionet e shpaguara, 5 milionë euro për tarifat menaxhuese të investimeve dhe operacioneve dhe 1 milion euro për refondimet, për të arritur kështu që në fund të vitit 2014 mjetet nën menaxhim të jenë në vlerën e 1.09 miliardë euro.

Pensione të shpërndara

Gjatë 2014-s ishin 4,049 llogari nga të cilat u tërhoqën mjetet, ndërkohë që vlera e mjeteve që në tërësi u tërhoqën gjatë vitit arriti në 14.3 milionë euro (2013: 10.7 milionë euro). Numri i përgjithshëm i llogarive me tërheqje prej themelimit shkoi në 24,552 (2013: 20,503), ndërkohë që vlera e përgjithshme e tërhequr nga këto llogari kaloi në 52 milionë euro (2013: 38 milionë euro).

Investimet në Kosovë

Fletobligacionet e emetuara nga Qeveria e Kosovës ishin e vetmja mundësi ligjore dhe reale për investimin e mjeteve pensionale në vend. Në fund të 2014-s investimet në këtë instrument ishin rreth 55 milionë euro, nga rreth 53 milionë euro që ishin një vit më parë.

Operacionet

Gjatë vitit 2014 Fondi i Kursimeve Pensionale vazhdoi të ketë rritje në të gjitha fushat e marrëdhënieve me klientë: shtypjen e pasqyrave të llogarisë, korrigjimin e adresave, aktivizimin e llogarive online, aplikimin për pension, përgjigjen në e-mail dhe uebmail dhe shërbimin eTrusti. Në total, numri i klientëve individualë të shërbyer nga FKPK-ja gjatë vitit 2014 tejkaloi shifrën 76 mijë, nga 67 mijë një vit më parë. Numri i pasqyrave që do t’u dërgohen kontribuuesve për vitin 2014 do të jetë rreth 432 mijë, i rritur kështu për 20 mijë nga 2013-ta, ndërsa numri i përdoruesve të eTrusti-t arriti në 37,222 i shtuar për 66% nga viti paraprak (2013: 22,459).

Gjithashtu fakti se edhe për vitin 2013 FKPK-ja mori opinion të pastër nga auditori i jashtëm profesional ishte tregues se aktivitetet operacionale vazhdojnë të realizohen në një shkallë të lartë të profesionalizmit./zeri/